Kawei na ka kynhun jong ki samla ka thain Ri Bhoi, hapoh ka lama jong ka Fish Farmers Producer Organization (FFPO) Cooperative Society Limited, ka don ia ka jingangnud kaba khraw na ka bynta ban kyntiew ia ki kam ri Dohkha bad kumjuh ruh ban ai kam ai jam ia ki khun samla lyngba ka kam ri dohkha.
Kum ban pynpaw, ia ka kane ka kynhun FFPO, la dep ban register ha ka 30 u Kyllalyngkot, 2023 ha Registrar Cooperative Society, Nongpoh bad ia kane ka kynhun la ithuh ruh da ka sorkar kmie, ka sorkar jylla bad na ka ophis u Deputy Commissioner ka Ri Bhoi bad ruh ka Fishery Department ka Ri Bhoi. Kane ka dei ruh ka kynhun ba nyngkong tam ha ka jylla Meghalaya, kaba la shim ia kane ka sienjam na ka bynta ban kyntiew ia ki kam ri dohkha bad ruh ban pynmih dohkha na ka bynta ka jingdonkam ki paidbah hapoh ka jylla.
Ha ka jingtreikam kane ka kynhun, ka la ioh ruh ia ka jingkyrshan na ka National Cooperative Development Corporation (NCDC) bad ban pyniaid ia ki kam, ka Cluster Based Business Organization, kaba na Assam, kan long ruh kum ka nongialam lynti na ka bynta ban pyniaid ia ki kam ki jam jong kane ka kynhun.
Ka long ruh ka jingmyntoi kaba khraw na ka bynta kane ka kynhun, namar ia ki nongtrei jong kane ka kynhun kiba pyniaid ia ki kam ki jam la kyrshan tulop da ka NCDC.
Haba ia kren bad U Chairman ka FFPO, U Bah Pynhunlang Mawroh, u la ong ba kum ki kynhun samla na ka dong Ri Bhoi, ki la mih shakhmat na ka bynta ban seng ia kane ka Fish Farmers Producer Organization, ka dei jingangnud ban kyntiew ia ki kam ri Dohkha ha Ri Bhoi bad ha ka jylla hi baroh kawei.
Lyngba kane ka kynhun, ngi don ruh ia ka thong ban ai kam ai jam ia ki samla lyngba ki kam ri dohkha bad ruh ban pyrshang ban ieng ha la ki jong ki kjat na ka bynta ban pyndap dohkha hapoh ka jylla.
Shuh shuh, U la pynpaw ruh kumba long haduh mynta wat la bun ki trai jylla kiba ri dohkha, hynrei kaba sngewsih ka long ba ngi dang hap ban shaniah ia ki dohkha kiba wan na shabar ka jylla, namar kum ka jylla kam pat lah ban pynbiang ia ka jingbam dohkha kumba la donkam da u paidbah ka jylla. Kane ka kynhun, ka khmih lynti ruh ban pyndap ia ki dohkha tang da kaba ki trai jylla ki ri hapoh ka jylla Meghalaya bad ban pynurlong ia katei ka thong, kane ka kynhun ka donkam ia ka jingkyrshan ba radbah ka sorkar jylla bad ruh ki paidbah jong ka jylla hi baroh kawei, u la bynrap.
