Ha ka jingrakhe ia ka lyngkhuh sngi iap ba 189 jong U Tirot Sing Siyem, ka party BJP na ka jylla Meghalaya ka la dawa na ka sorkar pdeng, ba dei ban ithuh noh ia u Tirot Sing Syiem kum u nongialeh laitluid ha ka ri bad ruh ban ai jaka na ka bynta ban pynieng ia ka u mot dur jong u Tirot Sing Syiem ha Parliament ban ithuh ruh ia u kum u syiem ba khraw ka ri.
Ia kane ka jingdawa ka party BJP na ka jylla, la pynpaw ha ka jingialang kynmaw burom bad leh burom ia u Tirot Sing Syiem mynta ka sngi ha ka ophis treikam ka BJP ha Nongbah Shillong, ha kaba la shim bynta da ki nongialam ka BJP ba kynthup ia u State Vice-President Khrawboklang Basaiawmoit, u dkhot ka BJP National Council U Bah David Kharsati, U State Chief Spokesperson, u Bah Mariahom Kharkrang, ka Dr. Fenela Lyngdoh Nonglait, kiba la ai jingkren ruh ha kane ka sngi.
Ka State BJP ka la rakhe kyrpang ruh ia kane ka lyngkhuh sngi iap ba 189 snem U Tirot Sing Syiem, da ki prokram bapher bapher bad kumjuh ruh wat ha ki District.
Ka State Mahila Morcha ba la ialam da ka President Susuki Pariat bad ruh ka BJYM ba la ialam da U Mebaker Lyngdoh, ki la pynlong ia ka jingleh burom da kaba leit buh syntiew ha ka mot dur U Tirot Sing Syiem ha State Central Library bad la pynkut pat da ka jingiapynkhuid paidbah ia ki bynta jong ka Nongbah Shillong kum shi bynta ban ai jinghikai shaphang une u Syiem ba khraw ka jaid bynriew kum uta u nongialeh laitluid ha ka ri.
