Ki lai tylli ki Trophy ba itynnad jong ka Durand Cup kaba 133 ki la wan poi sha ka nongbah ha Shillong bad la pyni da ka jingsngew sarong ha ka jingïalang kaba heh ha U Soso Tham Auditorium ha Secretariat Hills, ha ka jingïadonlang sngewbha jong u Myntri Rangbah ka Jylla u Conrad K. Sangma.
Katba ka nongbah Shillong ka dang pynkhreh ban pynlong ia kane ka jingialehkai phutbol kaba pawnam ha ka sien kaba nyngkong eh, Conrad u la ïaroh ïa ka jingpyrshang jong ka Durand Cup Organising Committee ha kaban wanrah ïa kane ka khyllipmat ba kongsan na ka bynta ka Jylla, ka ban buh ïa ka nongbah Shillong ha ka map phutbol jong ka Ri.
Kitei ki lai tylli ki trophy kin iaid kylleng ka nongbah bad ki district ba marjan, da kaba sdang na ka jaka ha ka jingdon lang u Conrad K Sangma, u Air Marshal u SP Dharkar, u Air Officer Commanding in Chief Eastern Air Command, u Lieutenant General Sanjay Malik, u General Officer Commanding 101Area, u Maj Gen Rajesh A Moghe, u Vice Chairman VSM Durand Cup Organising Committee bad katto katne ngut ki shipai ba rangbah bad ki shipai ba hakhmat eh.
Ia kine ki lai tylli ki trophy la pyni paidbah nyngkong ha ka 10 tarik u bnai Jylliew da ka President jong ka ri India, ka Droupadi Murmu ha nongbah Delhi.
Haba kren ha kane ka sni u Conrad ula ong, “Ka phutbol ka dei ka jingïalehkai kaba la ieit bad bud bha ha ka jylla Meghalaya bad ka long ka burom kaba khraw ïa ngi ban ïoh pdiang ïa ka Durand Cup kaba pawnam ha ka sien kaba nyngkong. Nga kyntu ia baroh ki paidbah ba ieid ia ka phutbol jong ka jylla ba kin wan peit ia ki jingialehkai bad nga ngeit skhem ba kin ioh ban pynbyrngia ia ki da ki katto katne ki jingialehkai phutbol kiba bha hapdeng ki katto katne ki kynhun ba pawnam”.
