Uwei u Hati khlaw sawkuna mynta ka step u la poi wad bam ha ki bynta jong ka skulbah Assam Don Bosco University kaba don ha Sonapur jong ka jylla Assam kaba la pynher syrngiew ia ki samla pule bad nongtrei jong katei ka skulbah.
Kum ban shu kdew, kane kamdei shuh ka sien ba nyngkong, hynrei manla la u snem, la ju iohi ia ki Hati khlaw kiba wan ha katei ka jaka ban wad bam bad pynjot ia ki jingthung jingtep kiba don ha katei ka skulbah.
Halor kane ka bynta, ki ba bun na ki paidbah ki buh ia ka jingkylli ba kaei ba ki bor jong ka tnad Wildlife ka la leh halor katei ka bynta ban khang lad ia ka jingwan rung jong ki Hati khlaw shapoh ki shnong ki thaw bad ki jaka paidbah da kaba ong ruh wat lada mynta kam pat don satia ka jingjia ba sngewsih, hynrei ka buh jingma pat lashai la sngi ia ki samla pule bad nongtrei ha kane ka skulbah.
