U Myntri Rangbah ka jylla u Conrad K Sangma u la khot iakren ïaki nongïalam ka Khasi Student Union ha ka sngi Palei hadien ka rai jong ka seng ban pynjur ia ka jingkhynra ïaki kot ki sla jong ki nongbylla kiba wan na kiwei ki jylla ha kylleng ka thaiñ Khasi bad Jaintia.
Naka liang ka sorkar lyngba ka Deputy Commissioner ka East Khasi Hills kala phah ruh da ka shithi sha u General Secretary ka KSU ban pyntip ba u Myntri Rangbah ka jylla u Conrad k Sangma u kwah ban ïakynduh ïaki nongïalam ka seng ha kamra treikam ka jong u haka 19 tarik Naitung haka por 12 baje mynsngi.
Naka liang ka KSU kala sdang ban khynra naphang ïaki bar jylla ha kine ki khyndiat taiew bala dep bad kynnoh palat 2500 ngut ki nongbylla bar jylla kim shym la lah ban pyni ïaki kot ki sla jong ki bad pynphai biang sha ka jaka ba ki wan bad dang ha kine ki khyndiat sngi, ka KSU kala pynieng haduh 3 tylli ki khyrdop Inner Line Permit (ILP) ha Jylla, kawei ka 20 mer Pahammawlein, Ri-Bhoi, ha Umstain, East Jaintia Hills bad kawei ka Athiabari, West Khasi Hills, bad naka liang u President ka KSU u bah Lambokstarwell Marngar u la pynbna ia ka rai jong ka seng ban pynjur shuh shuh ia ka jingkhynra ha ki sngi ban wan kam kum ka dak ban pyrshah ia ka jingbym lah jong ka sorkar jylla ban pyntreikam ia ki aiñ kiba la don lypa kiba kynthup ia ka Meghalaya Residents Safety and Security Act (MRSSA), 2016 bad ban pynbor ïaka sorkar pdeng ban pyntreikam mardor ia ka Inner Line Permit (ILP) haka jylla.
