Kum shi bynta ban wan rah ia ka jingiatylli bad ka jingiatrei lang na ka bynta ban tehsong ia ka longkur ka longjaid ha Ri Bhoi District, ka Synjuk ki Rangbah Kur ka Bri U Hynniewtrep mynta ka sngi ki la wan ban pynskhem ia ki nongialam ba pura ka Synjuk Ki Rangbah Kur Ri Bhoi District, ha ka jingialang kaba la long ha Dorbar Hall ka shnong Iewmawlong ha Ri Bhoi District.
Ki nongialam ka Synjuk ki Rangbah Kur ka Bri U Hynniewtrep kum ka seng kmie, ki la wan ban pynskhem ia ki nongialam ka Synjuk ki Rangbah Kur Ri Bhoi, khnang ba kin shim ia kata ka lyngkor kum ki nongialam ban trei na ka bynta ban pyniatylli bad ia trei lang ha kaba tehsong ia ka kur ka jaid ha Ri Bhoi District.
Ki nongialam ba pura kane ka synjuk ki Rangbah kur Ri Bhoi ba la pynskhem mynta ka sngi ki kynthup ia u u Adviser ba la jied ia u Bah Donbok KHymdeit, Adviser, Ploster Syiem, President Bah R.R Kynsai Makdoh, Vice president Bah Coming Myrsing, Vice President Bah Shandra Nongkseh, Secretary Bah Rudolf Born Makri,Joint Secretary Biolking Tmung, Joint Secretary Biestar Sylliang, Treasurer Bah R. Brister Shada bad kiwei kiwei .
Kane ka jingialang ba la pynlong mynta kam dei satia tang ban pynskhem ia kita ki nongialam ba pura ka Synjuk ki Rangbah Kur Ri Bhoi, hynrei ka dei kawei ruh ka thong ban lum ban lang ia ki riew rangbah na ka bynta ban iatrei lang ha ka ban tehsong ia ka longkur longjaid hapoh ka bri u Hynniewtrep hi baroh kawei.
Haba kren sha ki lad pathai khubor, u Bah R.L Kharpran kum u President ka Synjuk ki Rangbah Kur ka Bri U Hynniewtrep, u la ong ba ka synjuk ka dap da ka mynsiem jong ka jingkmen ba la ioh ban pynskhem pura ia ki nongialam ka Synjuk ki Rangbah Kur Ri Bhoi bad ka jingsngewkmen ruh ka long ba naduh u snem 2019 naduh ba la seng ia kane ka synjuk ka don ka jingkyrshan na ki paidbah katba shaba ki leit ban lum ban lang na ka bynta ban tehsong ia ka kur ka jaid.
U la ong ruh kaba kham hakhmat eh na ka bynta ban tehsong ia ka longkur longjaid, ka dei ka jingdonkam ban pyntreikam noh ia ka Clan Bill lyngba ka KHADAC bad shisien ba la treikam ka Clan Bill kum kata ka ain la lah ban tehsong ia ka longkur longjaid bad kino kino kiba pynkhein ia ki kyndon ain kin shah ha ka jingpynshitom kiba long katkum ki kyndon ka ain.
Shuh shuh, u la khot lawer ruh ia ki para jaid bynriew ba ki dei ban ia snoh kti lang ha kaba pyntreikma ia kata ka longkur ka longjaid bad kum ki kur ki dei ruh ban don kata ka Dorbar Kur kaba khlain, khnang ban lah ban pynneh ia ki riti ki dutur bad ia ka jinglong kyrpang ka jaid bynriew kaba tip kur tip kha bad kaba tip ia ka longkur ka longjaid.
Na ka liang u Bah Rangkynsai R.R Makdoh ruh, haba kren sha ki lad pathai khubor, u laong ba ka long kaba donkam eh ban tehsog ia ka longkur ka longjaid khnang ban im ka jaid bynriew bad kaba kham kongsan ngim dei ban klet ia la ki rit ki dustur na kata ka longkur ka longjaid, namar tang shu bakla ka longkur ka longjaid la thikna ba ka jaid bynriew jongngi kan kut noh.
Shuh shuh, ban im ka ri bad ka jaid bynriew, u la kyrpad ruh ia ki dorbar kur ba kin ia snoh kti lang ha kaba pynbha ia ka longkur ka longjaid bad khatam ha Ri Bhoi ba la ia khleh lang bun ki jaid bynriew ngi donkam ban iatylli bad ban ia trei lang khnang ba ngin lah ban pynneh pynsah ia kata ka longkur ka longjaid kaba dei kawei na ka riti ka dursur jong ka jaid byrniew jongngi, u la bynrap.
