Namar ki jingdonkam ba kyrkieh ban pynbit pynbiang bad ban kyntiew ia ki kam shakri paidbah lyngba ki lad jingsumar ha ka thain South West Garo Hills ha Baghmara, mynta ka 22 tarik u Naitung na ka liang ka Achik Conscious Holistically Integrated Krima ka la leit ban buh da ka dorkhas sha ka Director of Health Services (MI), ka tnat ka koit ka khiah ka sorkar jylla ban pynpaw ia ka jingdonkam kaba kongsan eh naduh ka jingdonkam ia ki doktor kiba biang (Specialist) bad ruh ia ka jingdonkam ban kyntiew kyrdan noh ia ki jaka sumar kum ki Sub Centre bad PHC ha ka thain Baghmara.
Na ka liang u Greneth M Sangma, Vice President ka ACHIK, u la kdew bad ban jur ba ka District Bagmara ka dei ka District kaba la kham rim bad dei hok ban ioh noh ia ki jingpynbit pynbiang kiba tikna khamtam kum ki lad jingsumar kiba kiwei kiwei ki district ki ioh na ka bynta ka jingmyntoi jong ki paidbah nongshong Shnong.
U la iathuh ruh, ba ha kane ka dorkhas ka ACHIK ka la buh ruh ia ki jingdonkam ba kynthup naduh ka jingdonkam ban kyntiew kyrdan noh ia ka Mindikgre Sub-Center sha ka PHC naka bynta ka jingmyntoi ki paidbah ka thain, ka jingdonkam iaki tnat sumar hapoh ka Civil Hospital kum ka tnat Gynaecologist, Psychologist, ENT Specialist bad kiwei kiwei de.
