Shillong, Naitung 24: Namar ka jingdonkam ia ki briew kiba lah ban kren bad sngewthuh ia ka ktien Khasi-Garo ha kawei ka tnad jong ka Postal ha ka jylla Meghalaya, mynta ka sngi ki nongialam ka Federation of Khasi Jaintia and Garo People (FKJGP), ki la leit ban pan jingshai na u Chief Post Master General halor ka jinglait jong ka Post Gramin Dak Sevak kaba lait kam ha Meghalaya.
Haba kren bad ki Nongthoh Khubor, u Bah Dundee Khongsit, President ka FKJGP, Sengkmie u la iathuh, ba ka seng ka la shimkhia ban leit pan jingshai halor katei ka post kaban lait ha Meghalaya, namar ka jingdonkam ban ioh da ki briew kiba lah ban kren bad sngewthuh ia ka ktien lajong khnang ban pynsuk bad pynmyntoi ia ki paidbah nongshong shnong ka jylla haba ki leit donkam ha ki Post Office bapher bapher hapoh Meghalaya.
“Ka jylla Meghalaya ka donkam ban ioh da ka Optional Language ia ki Khasi-Jaintia bad Garo ban thep ia kitei ki post ba lait ha Meghalaya bad ka seng ka dawa na u Chief Post Master General ban buh ia kane ka Optional Language”, Ong u Bah Khongsit.
U la iathuh ruh, ba hadien ka jingiakynduh ia ki bor ba dei peit ia ka Post Office, la sngewthuh ba ia kane ka kam donkam ba ka sorkar jylla kan shimkhia ban dawa na ka Ministry of Communication jong ka sorkar pdeng bad ka tnad Post Office ka sorkar pdeng ban thep da ka Optional Language na bynta ki 445 tylli ki post ba lait ha Meghalaya.
Shuh shuh ruh, u la iathuh na ia kine ki 445 tylli ki post, ba la mang ha Meghalaya ki don kiba thylli namar bym ioh ban thep kam lyngba ka ktien Khasi, English, la bynrap ruh, ba ki don haduh 683 tylli ki post ba lait na bynta ki samla khasi, Jaintia bad Garo bad ka tnad Post Office la la dep ban thoh sha ka Ministry of Communication bad sha ka tnad Post Office ka sorkar pdeng ban ioh ia kane ka Optional Language.
