Haba buddien ia ka jingioh lum jingtip kaba bniah halor ka jingdon ki kali ba kit Ganja, ki Pulit ka Ri Bhoi mynta ka step ha ka por 3 baje mynstep ki la ioh bat noh 2 tylli ki kali Pick-up ba don ia u number TR 05 F-1909 bad TR 04 D 1920 bad na kitei ki kali la ioh ban kurup haduh 45 song u Ganja ba la don ka jingkhia kaba 236.89 kilograms.
Kitei ki ar tylli ki kali Pick-up ba kit ganja ki la ngat ruh ha ka shrip ki Pulit ka Ri Bhoi, ka dei hadien ba la pynap shrip ha Lumdiengngan ba hap ka surok Shillong By-pass da ki Puit ka Ri Bhoi ba la iatrei lang ruh da ki Pulit na Khapmara PIC lem bad ka Anti Narcotic Task Force (ANTF)
Katkum ka tyllong khubor ba la pynlait da ka tnad Pulit na Ri Bhoi, la iathuh ba kawei ka kali pick-up ka phet sha Bhoirymbong bad kawei pat ka Kali Picp-up ka la ioh lad ban phet sha ka thain Umeit bad dei lyngba ka jingbeh thong ki pulit ba la ioh ban bat ia baroh at tylli kitei ki Kali Pick-up.
La pyntip ruh ba uwei u dribar bad u nongbut ka kali kaba don ia u Number TR 05 F-1909 ki la lait phet salit da kaba shim kabu ha ka jingdum ka miet da kaba ki la ioh lad ban phet sha khlaw, katba u dribar ka kali ba don number TR 04 D 1920, da ka jingbeh thong ki puit u la shah kem noh bad ba la tip kyrteng kum u Supan Chakma, 25 snem ka rta na ka shonong Nalkata ba hap ha ka Pecharthal Police station na West Tripura.
Khatduh eh, ka khubor ba la pynlait da ki pulit, la pyntip ba hadien ba la ioh kem bad ioh kurup ia utei u ganja la pyngat ia utei u ba don kti ha ka kyndon jong ka NDPS Act, da kaba la mudui hapoh ka Umïam Police station bad shuh shuh, na ka liang ki Pulit ka Ri Bhoi ki dang pynlong ia kata ka jingtohkit halor kane ka kam khnang ban dang ioh kem ia kito kiba shalan beain ia une u Ganja lyngba kane ka surok bah ha Ri Bhoi District.
