U President ba rangbah ka HYC Sengkmie, u Bah Roy Kupar Synrem u la kynnoh ba ka karkhana saiñ jri ha Mawsmai, Ri Bhoi District, ka dei ka karkhana ba pyniaid beaiñ khlem da don ka Trading License la shisnem ba khlem da pynthymmai satia.
Haba kren sha ki lad pathai khubor, u Bah Roy Kupar Synrem, u la kren pyrshah ia kane ka Karkhana pynmih jri, ka dei hadien ba u la pynpaw ba ka seng HYC kan dang bteng ban khynra ia kiba wan trei na bar jylla, ba ka sorkar haduh mynta kam pat lah ban pyntreikam ia ka ILP, ha kaba u la ong ruh ba lada ym lah pyntreikam ia ka ILP dei ban pyntreikam shuwa da ka MRSSA.
Haba kren pat halor ka Karkhana pynmih jri ha Ri Bhoi, kaba don ha Mawsmai ba la pyniaid da u bar jylla, u Bah Synrem u la ong ba ka seng HYC na Ri Bhoi, ka la leit ban jurip ia katei ka Karkhana ka dei halor ka nongrim ka jingbym don ia ka trading license, ha kaba la shi snem mynta khlem pynthymmai bad ruh ba ka seng ka la tip shai hadien ba la wad jingitp na KHADC ba katei ka Karkhana ba pyniaid da u bar jylla kam don satia ia ka trading license.
U la ong ruh ha katei ka jingleit jurip ka seng ia katei ka Karkhana pynmih jri, ka la don ruh ka thma ktien hapdeng u trai katei ka Karkhana pynmih jri bad ki dkhot ka seng bad dei namar ka jingpyni bor u bar jylla ba pyniaid ia katei ka Karkhana ka la pynlong ruh ia ki dkhot ka seng ban khang tala shi syndon ia katei ka Karkhana.
U la pynshai ruh ba ka seng kam don jingkhang satia ia ka jingwan bylla kiba briew kiba na shabar ka jylla ne ki pyniaid ia ki karkhana, hynrei haba ki wan bylla ne seng kam ki hap pat ban iaid katkum ki kyndon ba la buh da ka sorkar kaba ki hap ban bud ryntih ban pynbiang ia baroh ki kot ki sla.
Namarkata, u la kyntu ia ka sorkar jylla ba dei ban pyntreikam noh mardor ia ka ILP ha ka jylla bad lada ym lah pyntreikam ia ka ILP ruh, u lat ka jylla u dei ban ai noh ia ka rai ne ka muhor ban pyntreikam noh ia ka MRSSA Amendment Bill 2020 khnang ban lah ban tehlakam na ka jingwan rung beain ki briew kiba na shabar sha kane ka jylla Meghalaya.
