Haba leit ban pynskhem ia ki nongialam ka HITO Dulongnar Unit haka sngi Saitjaiñ, kum u President ka HITO na Ri Bhoi District, u Bah Shaniah Nongrum, u la kyntu ia ki nongialam ba thymmai kane ka Unit, da kaba ong, “Kum ki shipai ka seng HITO ngi shakri ia ka imlang ka sahlang ym na ka bynta ka mynta bad ngi shakri kum ki shipai na ka bynta ka pateng ban sa wan ka jaid bynriew.”
Haba kren ha kane ka sngi, u Bah Shaniah Nongrum, u la pynpaw ruh ia ka mynsiem jong ka jingkmen, ka daw ka long ba ki samla ki kloi ban wan rung sha ka seng na ka bynta ban long kum kita ki shipai ka jaid bynriew, kiba hap ban ker ban da ia ka jaid bynriew na ka jingwan hiar thma ba jar jar ki mynder.
U la ong ruh ka seng HITO ka dang don tang hapoh 3 snem ka jingshakri bad kum ka seng pat ka la leh shibun ki kam kiba ai jingmyntoi ia ki paidbah ka jylla bad u kyrmen skhem ba kine ki nongialam ba thymmai kane ka Unit ruh kin ia snoh kti lang na ka bynta ban dang pynkhlain ia ka seng, ba ka daw bah hi ka long ban shakri ia ki paradoh ki parasnam jong ka jaid bynriew.
Ki nongialam ka Dulongnar Unit ba la pynskhem mynta ka sngi ki ki kynthup ia u President ba la jied ia u Kitboklang Iangngap, Vice president Fairborn Iangngap, Working President Bashan Maiong, General Secretary Lucky Shylla, Assistant Secretary Pyndapjingkmen Lyngkhoi bad kynthup 30 ngut ki dkhot jong kane ka Unit. Ha kane ka sngi la sakhi lang ruh da ka jingdon lang u Marius Malai, General Secretary ka HITO Ri Bhoi bad kynthup kiwei kiwei ki nongialam.
