Ka phlim Rapture kaba dei ka phlim bala pynmih da u Dominic Sangma na Garo Hills kala ioh nam kum ka Best Cinematography haka 7th Malaysian International Film Festival 2024 kaba la long haka 28 tarik Naitung ha Kuala Lumpur.
Ïa katei ka khusnam la pdiang da u Toxo Xavier u ba dei u nongring dur ba don sap jong katei ka phlim, kaba la rah ïaka nam bad ka burom jong katei ka phlim kaba na ri lum Garo sha ki ri ka pyrthei.
Ka khana jong ka phlim “Rapture” ka long hapdeng ki jaidbynriew Garo ha Meghalaya, shaphang uwei u khynnah ba dang 10 snem u ba ioh ïaka jingpang matlah ki khmat haka por mynmiet (Night Blindness). U tei u khynnah u sah ha kawei ka shnong kaba don hapdeng ka jingtieng jingsyier namar ka jingjah jong ki briew na katei ka shnong ryngkat ka khubor hamsaia kaba pur sted halor ka jingdon ki nongrah bor kiba khaii ïaki dkhot met jong ki briew.
Ka jingiathuhkhana kaba sngewtynnad jong kane phlim kala khring ïaki nongpeitkai na kylleng ki ri ka pyrthei bad lyngba kane ka phlim lah ruh ban iohi iaka jingriewspah ka kolshor tynrai jong ki jaitbynriew Garo
Ïa katei ka phlim bala pynmih da u Dominis Sangma la kyrshan da u Hubert Bals, Visions Sud Est, bad ka Doha Film Institute, Xu Jianshang bad Sun Li, ki nongpynmih phlim ba paw ka ri India kum u Anu Rangachar, Harsh Agarwal, Aditya Grover, Stephen Zacharias bad ruh ka Eva Gunne R Marak kala don ka bynta ba kongsan ha ka jingpynmih ïa katei ka phlim.
Hadien shisnem ba la pyni ia katei ka phlim ha ka pyrthei baroh kawei, ïa katei ka phlim yn pynlait paidbah ha ka sien kaba nyngkong ha ka jylla Meghalaya haka 15 tarik Nailar ha Tura bad khmih lynti ba ki paidbah kin kyrshan bad pdiang sngewbha ia katei ka phlim.
Ka jingjop ka phlim Rapture haka MIFF ym tang ba ka pynpaw ia ka sap na rilum Garo hynrei ka buh ruh ia ka phlim jong ka thaiñ shatei lam mihngi jong ka ri India ha ka map jong ka pyrthei.
