U nongialam ba hakhlieh duh jong ka seng lehnoh Hamas, u Ismail Haniyeh u shah pyniap noh hynne ka step phyrngap ryngkat bad uwei u nongpahara katba u dang ioh thiah lyngngai ha ka jaka sah kaba kyrpang jong ki shipai kiba la shongthait noh kaba don ha ka nongbah Tehran jong ka ri Iran.
Kane ka jingshah pyniap jong u Ismail Haniyeh la pynthikna da ka Iran Revolutionary Guards, kaba dei ka tnad shipai jong ka ri Iran. La iathuh ba katei ka jingjia kadei tang hadien katto katne kynta ba utei u nongialam ka Hamas, u la dep ban wan iashim bynta ha ka jingpynbam smai ia u President ba thymmai ka ri Iran, u Masoud Pezeshkian.
Na ka liang ka ri Israel, wat hadien ba bun ki la kynnoh ba kadei maka kaba donkti halor kane ka jingpyniap ia utei u heh nongialam ka Hamas, hynrei kam shym la kam satia ba kadei ma ka, bad ialeh ban sngap jar halor kane ka jingjia.
Katei ka jingshah pyniap jong u Ismail Haniyeh kadei ruh tang hapoh 24 kynta ba ka ri Israel ka ther bom ha ka nongbah Beirut jong ka ri Lebanon ban pyniap ia uwei na ki nongialam ba la kham rim jong ka seng lehnoh Hezbollah, ia uba la tip kyrteng kum u Fuad Shukr.
Kumban shu kdew, u Ismail Haniyeh udei uba la donkti bad ka seng Hamas ban leh ia ki kam pyntriem pyrshah ia ki jiw naduh u snem 1980 ter ter bad uba la shah kem bad shah set along ruh la bunsien hapoh ka ri Israel. Hadien ba pyllait na along ka ri Israel ha u snem 1992, la pynryngkangpar noh ia u ryngkat kiwei de ki nongialam ka ri Israel sha ki bynta kynja ba shathie jong ka ri Lebanon. Ha u snem 2006, u Ismail Haniyeh u la shah jied kum u Myntri Rangbah jong ka ri Palestine tad haduh u snem 2007.
Naduh u snem 2018 pat, u Ismail Haniyeh u la leit ban sah noh sha ka nongbah Doha jong ka ri Qatar bad thaw ruh ia ka ophis treikam ba thymmai jong ka Hamas ha katei ka nongbah ban pyniaid ia ki kam ki jam jong ka Hamas ha Gaza bad West Bank.
U Supreme Leader jong ka ri Iran, u Ayatollah Ali Khamnei u la pynpaw ia ka jingsgewsih kthang halor katei ka jingshah pyniap jong u Ismail Haniyeh bad byrngem ruh ban pynshitom da kaba tyngeh pyrshah ia ka ri Israel.
