Sa arsngi ba ki kynhun kiba don ha ka Group-F ha ka Durand Cup, kin sa ialehkai ha Madan JN Stadium ha Nongbah Shillong, kumba ka long mynta ka jingpynkhreh ha Madan JN Stadium ka la iaid shaid shaid bad mynta ka sngi u Myntri ki kam ialehkai ha ka jylla, ha ryngkat ka jingdon ki heh shipai bad kiwei ki ophisar sorkar, ki la leit ban jurip bad ban peit ia ka jinglong jingman shwa ban pdiang ia ka Durand Cup.
Ka jingialehkai jong ka Durand Cup ha JN Stadium, kan sa long ha ka 2 tarik u Nailar, ha kaba ka jingiakhun kan long hapdeng ka Shillong Lajong Football Club pyrshah ia ka Tribhuvan Army FC na Nepal, ia kaba kin sa lehkai ha ka por 4 baje janmiet.
Shwa ban sdang ka jingialehkai, yn don shwa shibun ki prokram bad ki ban sdang naduh ka por 2 baje nohphaisngi bad ki ban sa kut shwa ka por ban sdang ka jingialehkai.
Lah ruh ban kdew hangne, ba ha ka Group-F ki don saw tylli ki kynhun, kita ki kynthup ia ka Shillong Lajong Football Club, ka Tribhuvan Army FC na Nepal lem bad artylli ki kynhun kiba don ha ka Indian Super League kiba kynthup ia ka FC Goa bad ka Hyderabad Football Club.
