Hadien ka jingïakhih bad pynrem jur da ka kynhun All Manipur Working Journalists Union bad ka Editors Guild, Manipur, halor ka jingshah ktah kti jong uwei u nongthoh khubor jong ka Impact TV ha uwei u pulit Sub-Inspector, u tei u pulit u la shah sospon noh hadien ba u SP ka Imphal East District u la pynmih da ka hukum.
Katkum ka khubor bala ioh lum u Mutum Rameshchandra u ba dei u nongthoh khubor jong ka Impact TV u dang pyndep ïala ka kamram kum u nongthoh bad nonglum khubor ha kawei ka jingïalang paidbah jong ki paid Manipur kiba la kylla phetwir bala pynlong da ka Committee on Protection of Meitei Victims (COPMeV) haka 1 tarik Nailar, hynrei uwei u pulit SI bala tip kyrteng kum u Sh Nikhil u la leit ban knieh ïaka mobile phone jong utei u nongthoh khubor bad bret ha madan.
Wat hadien ba u pynithuh ba u dei u nongthoh khubor da kaba pyni ruh ïa ka ID u tei u pulit SI u la kren heh pynban bad sdang ban ktah kti haduh ba un da mynsaw bad rah sha jaka sumar.
Halor katei ka jingjia naka liang ka kynhun ki nongthoh khubor naka jylla Manipur kila pynpaw ba kum kane ka jingjia kim shym la khmih lynti na u pulit ophisar u ba bat ïaka aiñ, bad pynlong ruh ka jingïakhih ban leh eiei ïa utei u pulit ophisar bad kum ka kynhun kala leit ruh ban ai da ka jingthoh sha u Myntri Rangbah ka jylla Manipur u ba la kular ruh ban shimkhia bad ban pynlong ka jingtohkit hapoh 2 sngi bad hadien ka jingtohkit yn sa lah ban shim rai pyrshah ïa utei u pulit ophisar.
Tang hadien 2 sngi naka liang u K Meghachandra Singh SP ka Imphal East District u la pyntip bala dep ban sospon ïa u Sh Nikhil bad kum ka tnad pulit kam shym la khmih lynti ba utei u pulit ophisar ba bat ïa ka aiñ un ktah kti ïa u nongthoh khubor.
Shuh shuh naka liang ka kynhun ki nongthoh khubor na Manipur kila dawa ruh ba utei u pulit ophisar u dei ban siew lut baroh ka jinglut jingsep bad ka bai dawai jong utei u nongthoh khubor u la shah ktah kti bad mynsaw.
