Katba ka jingiakhih shongkyllainmongor ki SSA Non-teaching staff ka dang iaid bteng haduh mynta ka sngi u Blei ba la poi 5 sngi ba ki la pynlong ia kane ka prokram ia khih ban dawa ia ka hok jongki bad mynta ka sngi u Blei ruh kane ka kynhun SSA Non-teaching staff ki dang bteng ia ka jingiakhih shongkylainmongor ha ka jaka kaba ki la pynlong ha Madan Malki ha Nongbah Shillong.
Kumba la sakhi mynta ka sngi, ki SSA Non-teaching staff ki la dang bteng ka jingiakhih wat mynta ka sngi kaba dei ka sngi U Blei da kaba shongkyllainmongor ha Madan Malki, hynrei kaei kaba pynlung mynsiem ba wat hapdeng ka jingiakhih ban dawa ia kata ka hok jongki, ki la pynlong da ka jingiaseng ban ia shim bynta lang da ki jingduwai bad ki jingrwai ha katei ka jaka kaba ki la pynlong ia ka jingiakhih.
Kum ban pynkynmaw, kane ka jingiakhih shongkyllainmongor ki SSA Non-teaching staff ba ki la pynlong ha madan Malki, ka dei ka jingdawa jongki ban kyntiew ia ka tulop jong ki bad kim shym la hun satia ia ka jubab ka sorkar kaba la rai ban kyntiew ia ka tulop jong ki tang da ka 25 pecent.
Kane ka jingakhih kine ki SSA Non-teaching staff ha ka jylla ka dei ruh ha ka lama ka All Meghalaya SSA Non-Teaching Staffs Association (AMSSANTSA)
Shuh shuh, wat la ka la don ka jingkular na ka sorkar ban kyntiew ia ka tulop jong ki kaba ki la pynpaw ban kyntiew kumba 25 percent, hynrei kine ki kynhun SSA Non-teaching Staff ki dang bteng ia ka jingiakhih, namar kumba la pynpaw da ki nongialam katba ka sorkar kam pat lah ban kyntiew haduh 80 percent ia ka tulop jongki, kin dang iaid bteng ia ka jingiakhih da kaba shongkyllainmongor ha katei ka madan ha Malki.
Ka khubor ba shai ba ki la pynpaw sha ka sorkar ruh ka dei ban kyntiew ia ka tulop kaba 80 percent bad nalor kata kynthup ruh 2 percent na ka bynta kito kiba la trei slem bad 5 percent dei ban pynkiew ia ka tulop ba man la u snem.
