Ka Rangdajied United Football Club, ka kynhun ba wan ba-ar ha ka Shillong Premier League, mynta u snem ka la ioh ia ka kabu ban iakhun ha ka Durand Cup 2024, kata ka dei hadien ba ka Hyderabad Football Club, ka kynhun kaba don ha ka Indian Super League, ka la pynbna ba ka la weng noh ialade ban iakhun ha ka Durand Cup ba mynta u snem.
Ka jingiakhun ba nyngkong jong ka Rangdajied United FC kan dei lashai ka 5 tarik pyrshah ia ka FC Goa, ka kynhun ialehkai ba khlainbor ha ISL bad kaba wan ha ka kyrdan ba-lai ha kane ka ISL kaba mynta ka samoi, ha kaba ka jingiakhun ka long ha ka por 7 baje mynmiet ha madan JN Stadium, Polo.
Ka rai jong ka Hyderabad FC ban weng noh ialade na kaba iakhun ha ka Durand Cup ba mynta u snem, ka la long ka kabu ia ka Rangdajied United FC ban ioh iashimbynta ha katei ka Lympung ialehkai phutbol ba la rim tam ha Dewbah Asia bad ha ka pyrthei hi baroh kawei.
Nalorkata, kan long ruh ka kabu ia ki samla Khasi bad kiba ialehkai na ka Rangdajied United FC, ba kin iakynduh ne iakhun pyrshah ia kiwei pat ki rangialehkai kiba lehkai na ka FC Goa bad kiba dei ruh ki rangialehkai, kiba la ioh ia kata ka jingshah pyntbit kaba la biang pura.
