: Hadien ka jingther u lapbah mynta ka sngi ba la neh da ki kynta, kiba bun ki surok paidbah ha Ri Bhoi ki la shlei um bad kane ka la wan rah ka jingsyrtok ia ki paidbah nongleit nongwan bad ruh wat ia ki kali paidbah kiba la hap ban iaid na ka um ba la tap ia ka surokbah.
Kine ki bynta ba la shah ktah na ka jingshlei um ka dei ha ki bynta pdeng ka sor Nongpoh, ha ka thain Bethany Hospital Nongpoh bad kynthup ruh ha ki bynta jong ka thain Gowngate ha Nongpoh.
Ha kane ka jingshlei um ka surokbah bad kynthup ruh ka surok service lane ba pyndonkam ki paidbah ka la ktah ym tang ia ki nongleit nongwan bad ka la ktah ruh ia ki nongshong dukan kiba la hap ban khang noh ia ki dukan na ka daw ka jingshlei um.
Halor kane ka jingshlei um la ioh ruh ban ia kren naduh ki khynnah skul, ki paidbah bad ruh ki nongshong dukan, ha kaba ki la pynpaw ka jingsngewkhia kaba jur halor kane ka jingshah ktah na ka jingshlei um, namar kane kam dei ka sien kaba nyngkong bad la bunsien tang shu wan u lapbah ki la hap ban mad ia ka jingshlei um kaba la tap ia ka surok bad teng teng ka um ka la rung shaduh ki dukan.
Kumba la sakhi bad ba la pynpaw da ki paidbah, ka daw kaba la pynlong ia kane ka jingshlei um, ka dei ka jingbym biang ki Nala um jong ka surok 4-lane bad halor kane ka phang na ka por sha ka por ki paidbah ki la ju pynsngew ia kine ki jingeh, hynrei namar ka jingbym shim khia ki bor ba dei peit kum ki paidbah hapoh ka sor Nongpoh ki la hap ban mad ia ka jingshlei um kaba khah khah tang shu ther u lapbah.
