Ka jingther jong u lapbah lapsan mynta ka sngi, ka 5 tarik u Nailar 2025, ka la wanrah ia ka jingshlei ba shyrkhei ha Ri Bhoi District naduh ka sor Nongpoh bad ruh sha ki bynta kiba hap ha ka Jorabat ba kynthup ia ki shnong Mawsmai 11 Mer, 9 Mer Baridua, ka jingkieng Jorabat ha kaba la iohi ba ki lynti syngkien ki la shah tap lup ha ka umsaw bad buh jingeh shikatdei ia ki nongleit nongwan.
Kane ka jingshah ktah kam dei satia tang ia ki paidbah nongleit nongwan da ki kali, hynrei wat ia kito kiba shongdukan, kiba iaid lynti ruh kumjuh naba ka umsaw ka ioh ban tap lut ia ki surok bad ki lynti syngkien.
La iohi ruh ia ka jingshah ktah jur ha ki bynta jong ka surokbah National Highway 37 ha kaba ki nongleit nongwan, khamtam kiba pang ba shitom kiba thmu ban leit shah sumar kyrkieh lyngba ka ki kali kit nongpang lane ki ambulance ruh ki la sahkut da ki kynta ha kane ka jingshlei um kaba la neh bun bun kynta, khlem da iakren ia ki khynnah skul bad ki paidbah nongleit nongwan kiba la ngat ha kane ka syrtok.
