U Ken Syiem, uba dei u Syiem ka Raid Marwet, haba kren sha ki lad pathaikhubor mynta ka sngi, u la ong ba un sa ujor da ka ‘Defamation Case’ ne ban dawa ia ka bai mynrain khmat pyrshah ia u Uma Shankar Mishra, namar ka jingkynnoh ba khlem nongrim jong u pyrshah ia u Syiem ka Raid Marwet, da kaba ong ba u dei u u ‘Dalal’ ne u nongdie ha ki shnong khappud bad khamtam ha ka thain Barapathar kaba hap hapoh ka Raid Marwet.
U Syiem ka Raid Marwet, haba pynshai halor katei ka jingshah kynnoh, u la ong ba ka jingkren jong u Uma Shankar Mishra, uba dei na Mawpat Shillong, ka la ktah eh ia u kum u Syiem ka Raid Marwet, namar ka dei ka jingkynnoh kaba ym don nongrim haei haei ruh, hynrei ka dei ka jingthmu ban pynjah burom ia u Syiem.
Haba batai halor ka jingshah kynnoh die tuh ia ki jaka ha Barapathar sha ki briew na Assam, u Syiem ka Raid Marwet, u la ong ba u Uma Shankar Mishra, uba la kam ruh ialade ba u dei u trai ia kawei ka jaka kaba don haduh 500 akar, kaba kynthup naduh Khanapara shaduh Barapathar bad ha kitei ki jaka ba u la kam, la kynthup ruh ki jaka ba don ka karkhana tylliat maw jong ki briew kiba dei na ka jait Shylla.
U Uma Shankar Mishra, u dei u riew thok riew shukor bad ki kot ki sla kiba u don ki dei kiba la shna thok, namar ha ki kot ki sla jong ki kam jaka puta ha ophis u Syiem ka Raid Marwet kim shym la don satia bad kaba la pynsngew lyngoh eh ia u Syiem, ka dei hadien ba u Uma Shankar Mishra, u la kam ialade ba u don ia ki kot ki sla naduh ki por ba synshar ki Phareng.
U Ken Syiem, u la ong ba lada u Uma Shankar Mishra, u dei shisha trai jaka kumba u la kam, balei um wan mih ne wankam ha ki por ba iakajia ki kam khappud bad khamtam eh ha ka por ba la don ka jingiapynbeit khappud hapdeng ka Meghalaya bad Assam.
Namarkata, na ka liang u Syiem ka Raid Marwet, u la kyntu ia ki paidbah ba kim dei ban ngeit ia kaei kaba ong u Uma Shankar Mishra, namar ka dei tang ka jingkynnoh tang ban pynthohbria bad kaba dei ruh ka jingkynnoh kaba khlem don nongrim haei haei ruh em.
