Ha ka jingjia ba ther u slap hynnin ka sngi ha Ri Bhoi, ki la don shibun ki jaka kiba la shah ktah bad ki jaka kiba la kham jur ka jingshah ktah ki dei ha ki shnong kiba hap ha Jirang Constituency, ha kaba ka jingshah ktah ka la dei naduh ha ki skul, ki iing briew bad ki surok iaid briew ruh kumjuh.
Haba phai halor ka jingshah ktah na ka jingther u slap hynnin ka sngi, ki la don katto katne tylli ki skul ba la paw ha ka thain Jorabat shaduh Khanapara ki la hap ban ai shuti ia ki khynnah, namar ba kim long shuh ban pynlong skul, ba ka um ka la rung sha manla ki kamra skul.
Nalor ka jingshah ktah ki skul, la don ruh ka jingshah ktah ki iing ki sem jong ki briew bad kumjuh ruh ki surok ne ki lynti ba ki briew ki iaid ki ieng. Halor kata ki jaka kiba la shha ktah eh ki dei ia ki briew kiba shong ba sah ha shilynter ka surok na Baridua, Killing ter ter shaduh Umtyrnga.
Haba iadei bad katei ka jingshah ktah ki paidbah bad ki skul, u Bah Sosthenes Sohtuh, MLA Jirang, ha ryngkat ka jingdon ki briew na ki ophis BDO, ki la leit ban jurip ia kitei ki skul bad ki jaka kiba la shah ktah eh. U MLA Jirang u la kyntu ia ki briew sorkar ba ki dei ban pynkloi ka rukom ai jingiarap ia kito kiba la shah ktah eh, lyngba kata ka Emergency Relief Fund.
