Tang hadien ka jingmih noh ka Sheikh Hasina kaba la resaiñ ruh kum ka Myntri Rangbah duh ka ri Bangladesh, ki jaitbynriew rit paid ha katei ka ri khamtam ki Hindu mynta kila mad ka jingshah thombor bad kumba hynniew tylli ki iing jong ki Hindu ki la shah thang mynta ka sngi ba ar, katba ki kynhun runar ki dang bteng ban pynjulor ia ki jingtei ha kylleng ka ri.
Katkum ki tyllong khubor, Ki paid Hindu mynta ki mad ïa ka jingeh kaba khraw na ka jingshah thombor ha ki paidbhur tang hadien ba ka Myntri Rangbah barim ka Bangladesh ka Sheikh Hasina ka la risaiñ bad phet krad na Dhaka ha ka 5 tarik u Nailar.
Ha kajuh ka por, ka Vishva Hindu Parishad (VHP) ha ka sngi Balang, ka la kyntu ia ka sorkar ba kan shim ia kano kano ka sienjam ban pynthikna ia ka jingshngaiñ jong ki Hindu, ki Sikh bad kiwei kiwei ki rit paid ha Bangladesh, kumba ka jingshah thombor bad byrngem kala long kaba shyrkhei ha kylleng ki jaka jong katei ka ri.
Shuh shuh uwei u nongïalam ñiam jong ki Hindu bala tip kyrteng kum u Haradhan Roy Hara u ba sah ha nongbah Rangpur u la shah pyniap, kynthup ruh da ki spah ngut kiwei pat.
