Mairang, Nailar 6: Ka Pyndengumiong District Sports Association (PDSA), mynta ka sngi ka la ioh ban plie pyrda noh ia ka lympung ialehkai phutbol kaba la ai kyrteng kum ka 5th Tirot Sing Syiem Memorial Trophy ha ka madan ialehkai jong ka shnong Dommawlum, Eastern West Khasi Hills District.
Ia kane ka lympung, la wan ban plie paidbah da u Syiem Khynnah ka Hima Nongkhlaw, u Syiem KM Syiem ha ka jingiadon ryngkat jong u Bah Lambok Nongrang, President ka PDSA, u Bah B Syiemiong, Sordar ka shnong Pyndengumiong, u Bah Risin Nongsiej, Secretary shnong Pyndengumiong lem bad kiwei kiwei de ki riew rangbah.
Kumba 16 tylli ki kynhun ialehkai na kylleng ka thain, kin wan ban iashim bynta ha kane ka lympung ialehkai phutbol bad ha kane ka sngi sdang mynta ka sngi, la iakhun hapdeng ka Thymmei Hynniewtrep Football Club pyrshah ia ka Pynnoh Ri War Football Club.
Khyndiat haba phai ia ka jingialehkai ha kane ka sngi sdang, ka jingiakhun ka long shisha kaba iakhaid bad kaba pynshongshit ia ki paidbah nongpeitkai kiba la wan ban sakhi. Ha ka kylla step jong ka jingiakhun, ka Thymmei Hynnewtrep Football Club ka la ioh ban thep ia ka kol kaba nyngkong pyrshah ia ka Pynnoh Ri War Football Club lyngba u Chesterpaul Lyngdoh ha ka minit kaba 27.
Ha ka kylla miet jong ka jingialehkai pat, ka Thymmei Hynniewtrep Football Club ka la ioh biang ban thep sa shi kol ha ka minit kaba 56 lyngba u Kordor Dkhar. Na ka liang ka Pynnoh Ri War Football Club ka la iakhun tyngeh bad sei iala ki sap ki phong ban pyniakhaid hynrei, ka la ioh ban pynphai tang das hi kol ha ka minit kaba 87 lyngba u Balajied Syiemlieh. Kumta lyngba kitei ki ar tyli ki kol, ka Thymmei Hynniewtrep Football Club, ka la lah ban pynliem noh ia ka Pynnoh Ri War Football Club da 2 kol la 1.
