Nongpoh, Nailar 6: Ki nongialam jong ka Ri Bhoi Peoples Council (RBPC) mynta ka sngi, ki la pynlong ka jingleit jurip ia ka shnong Umladoh halor ka jingshah pynjot dusmon ki jingthung jingtep jong ki san tylli ki longing ha ki bor jong ka tnad Forest ka Khasi Hills Autonomous District Council (KHADC) Lailad Beat ha ka 3 tarik jong u bnai Nailar 2024.
Kum ban shu pyntip biang, kitei ki san tylli ki longing kiba shah ngat ha katei ka jingleh dusmon ki bor ka KHADC ki kynthup ai ka Kong Prin Umsong, ka Kong Brina Sylliang, Kong Slis Lyngdoh, Kong Ormilis Lapang bad ka Kong Phiarnes Sylliang. Kine ki longkmie, ki la kynnoh ba ka tnad Forest jong ka KHADC ka la wan ai jingtip iaki ha ka 1 tarik u Nailar bad khlem da ai por eiei, kynsan kynsan ha ka 3 tarik u Nailar 2024, ki la wan da ki kor ki bor ban pynjot bad pom naphang ia baroh ki jingthung jingtep ki jongki, kiba ki im bad bsa iala ka ing ka sem.
Kitei ki longkmie ki la iathuh ruh ba wat lada ka KHADC ka la kamtrai ia katei ka jaka kaba ki la rep la riang mynta da ki bun bun snem, hynrei kin nym ailad satia ba kin shah iuh roit iala ka hok bad ba kin ieng skhem ban ioh iakhun ia ka hok ka jongki bad khamtam eh ban dawa ruh ia ka bai lutksan halor katei ka jingwanleh dusmon ki bor ka KHADC pyrshah ia ki jingthung jingtep ki jongki.
Na ka liang u President ka RBPC, u Bah Jayson Lennox Nongrum u la ong ba kum ka seng kaba peit ba khmih ia ka jingeh jong ki paidbah, kam lah ban shu peit tang da ki khmat haba ka iohi ia kine ki jingshah thombor ia ki duk ki rangli da kaba pynrem jur ruh ia ka KHADC kaba la leh ia katei ka kam dusmon khlem ka jingpyrkhat bad jingisynei.
U la pynpaw ba kum ka seng kan iai don ryngkat bad kitei ki longkmie kiba ngat ha katei ka apot bad ba shen ha kine ki sngi ki ban sa wan, na ka liang ka seng kan sa leit ban kynduh ia u Chief Executive Member ka KHADC, u Bah Pyniaid Sing Syiem ban iakren halor kane ka bynta bad ruh ban pynioh ia ka hok jong kine ki longkmie kiba la shah pynjulor dusmon ia ki jingthung jingtep ki jongki.
