Ka Shillong Municipal Board (SMB) ha ryngkat ka tnad ka koit ka khiah, hynnin ka sngi ka la pynlong da ka jingpynrung kyrteng ba 2 sngi lynter ïa ki nongtrei ka Shillong Municipal Board hapoh ka Meghalaya Health Insurance Scheme (MHIS) bad ka Pradhan Mantri Jan Arogya Yojana (PMJAY).
Ïa kane ka jingpynrung kyrteng la pynlong ha Shillong Municipal Board Office Compound, bad ha Marten Waste Processing and Disposal Site, Mawlai, daka jingthmu ban ai jingïada naka koit ka khiah ïa ki nongtrei, ban pynthikna ïa ka jingbit jingbiang bad ka jingshngaiñ jong ki bad ha katei ka sngi kumba 330 ngut ki nongtrei kila shah pynrung kyrteng ha katei ka camp ba 2 sngi ba kynthup 212 ngut ha ophis ka SMB bad 118 ngut ha Marten kaba don ha Mawlai.
Lyngba katei ka jingpynrung kyrteng ka sorkar jylla kan pynthikna bad kular ba uwei pa uwei u nongshong shnong un ioh ka jingshakri haka koit ka khiah.
Ka Ayushman Bharat Yojana, kaba la tip ruh kum ka Pradhan Mantri Jan Arogya Yojana (PMJAY), ka dei ka skhim ai jingsumar kaba la sdang da ka sorkar India ha u snem 2018. Ka jingthmu ba kongsan jong ka, ka long ban ai ka jingsumar kaba pura haduh T.5 lakh na ka bynta kawei ka longïing ha ka shisnem.
