Ka seng Voice of the People Party na Pynursla Circle ka pynpaw ka jingsngewkhia halor ka jingpynbna korphiw jong ka sorkar Meghalaya ha ki thaiñ khappud bad ka ri Bangladesh. Kane ka jingpynbna ka la mih hynnin nin ka sngi na u Symbud Myntri Rangbah jong ka jylla Meghalaya, i Bah Prestone Tynsong. Kane ka la wan hadien ba ka jingïakhih paidbha ha Bangladesh ka la nang jur kat haduh ba ka Prime Minister jong ka ri ka la hap ban phet rieh noh shabar ri.
Ka seng VPP kam pyrshah ïa katei ka jingpynbna korphiw hynrei ka kyntu ïa ki paidbah jong ka thaiñ ba kin long kiba peitngor bad husiar bha ha kiba kum kine ki por khamtam eh ha ki kynta jong ka korphiw. Lada la pynjari ïa ka korphiw bad ym biang ki shipai pahara ha shi lynter u pud bad ki paidbah ruh ki ïohthiah lyngngai ha la ïing, ka lah ban long pynban ka jingailad ïa ki khar bangla ban wan rung suk shapoh Meghalaya.
Kumba ka long mynta, kam don kano kano jingktah ïa ka shongsuk shongsaiñ ha ki thaiñ khappud na katei ka jingjia ha Bangladesh bad la sngewthuh ba katei ka korphiw ka long tang ka lad jingïada. Kumta ka VPP ka kyntu ïa ka sorkar ba kan pynthikna ïa ka shongsuk shongshngaiñ jong ki paidbah ha ki thaiñ khappud bad ruh ban pynkhlaiñ ïa ka jingpahara ha kiba kum kine ki por. Ka seng ka kyntu ruh ïa ki paidbah ba kin long kiba sian bad peitngor bha ha kaba kum kane ka khep, kane ka long katkum ka kyrwoh ba la phah da u Bah Shemborlang Rynjah, Joint Secretary ka VPP, (I?C Pynursla Constituency.
