Ka North East Students’ Organization (NESO) ka la pan ïa ka jingïarap mardor na u Myntri Rangbah duh ka ri India, ban pynthikna ba ym don ki briew kiba wan rung be-aiñ na Bangladesh sha ki jylla ka thaiñ shatei lammihngi (North East).
Ka NESO kaba dei ka kynhun jong ki 8 tylli ki kynhun jong ki samla pule kiba mihkhmat ïa ki hynriew tylli ki jylla jong ka thaiñ shatei lammihngi (North East) ka la kyrpad ruh ïa u Myntri Rangbah ba un nym ai jaka rieh tngen ne jaka sah ïa ki nongwan buhai shnong na Bangladesh ha katei ka thaiñ.
Kane ka seng ka la pyntip sha u Myntri Rangbah duh jong ka ri India ba ka Tripura ka ïasam ïa u pud u sam uba 856 kilomitar, ka Meghalaya ka don 443 km, ka Mizoram ka don 318 km ka jrong bad ka Assam ka don ïa u pud u sam lang uba 262 km bad ka Bangladesh.
“Ka jingeh kaba dang ïaid shakhmat ha Bangladesh kan wanrah bad ka lah ban wanrah ïa ka jingphetwir jong ki nongshong shnong jong ka sha ka ri jong ngi khamtam ha ka thaiñ shatei lammihngi. Ki jingjia kiba la dep ki pyni ba man la ka por ba don ka thma pohïing ne ka jingkulmar ha Bangladesh, ka thaiñ shatei lammihngi ka ju hap ban kit ka jingjur jong ki jingwan buhai shnong be-ain na kane ka ri bad ia kane la sakhi ha ka por ba phiah ha ka snem 1947 bad ka thma pyllaitluid ia ka Bangladesh ha ka snem 1971, ha kaba da ki lak ngut ki Bengali na East Pakistan ki la jam be-ain ia u pud u sam bad ki la knieh jubor ia ki jaka ha Assam bad Tripura (ha kata ka por ka dei ka Union Territory) bad ka Meghalaya” ong ka NESO ha ka shithi sha u Myntri Rangbah.
Ka NESO ka la ong ba ka thain shatei lam mihngi ka dei ka jaka ba don shibun ki jaitbynriew trai ri kiba long kiba rit paid ha ka jingbun bad ki im hapdeng la ki jong ki jaitbynriew ha ki jaka ba la buh dak tynrai.
“Ka jingwan jong ki million ngut ki nongwei beain na kiwei pat ki ri ka la wanrah ia ka jingiakhun ia ka jaka, ka jingpynrung ia ka kolshor jubor, ka jingiakhun ha ka liang ka ioh ka kot bad ka jingbym shaniah hapdeng ki nongshong shnong trai ri bad ki nongwei namar kine ki nongwei beain ki wan shong shnong ha ki jaka jong ki jaitbynriew trai ri khlem ka jingmynjur jong ka ki nongialam shnong bad kumta ka pynmih ia ka jingsngew pyrshah hapdeng ki ar kynhun” ka la ong.
Ka NESO ka la ban jur ba ha kum kane ka por, ka long kaba donkam eh ïa ka Sorkar India ban pynthikna ba u pud u sam hapdeng ka North East India bad ka Bangladesh u dei ban long uba biang bad uba pyrkhing bha khnang ban lah ban iada ïa ki jingpyrshang ban buhai shnong be-aiñ na shiliang u pud u sam.
