Namar ba dang don ka jingshah ot kilo ki mar rep, hynne ka sngi ka seng Hills Farmers Union (HFU) ha ryngkat ki nongrep kila leit kynduh ia u Chief Executive Member (CEM) ka Khasi Hills Autonomous District Council (KHADC) ban tuklar halor kane ka mat.
Ki nongrep haka jingkynduh ia u CEM kila kyntu ba un tuklar noh mardor bad haka juh ka por ban pynduh syndon ia kane ka jingshah ot kilo ki mar rep, jong ki nongrep ba wan die ha Iewduh.
Ki nongrep ki la iathuh ruh ba ki ju shah khate beit haduh 10 kilo na ka 100 kilo ki mar rep ba ki rah sha Iewduh.
Ki la iathuh ruh ba kum mynta ba u sying u lah dor haduh palat 100 tyngka shi kilo kumta ka jingduh nong ka jur bha lada shah khate 10 kilo man ka 100 kilo.
Ha kane ka jingkynduh ia u CEM, ka HFU kala pynkynmaw ruh ba watla ka KHADC ka la don ia ka ain ba tip kum ka Management and Control of Market Act hynrei haduh mynta kam pat treikam satia.
Ka HFU kala kam ba ki mahajon ha Iewduh, kim burom ia ka Management and Control of Market Act namar ka jingshah ot kilo iaki mar rep ka dang iai bteng.
Haba kren sha ki lad pathai khubor u President ka HFU U Bah C Shangpliang ula iathuh ba u CEM u la kular ba shen ka Council kan peit ia kane ka kam bad wanrah noh iaki kyndon khnang ba kan weng noh ia ka jingeh jong ki nongrep.
“Na ka liang u CEM u la dep ban kular ba mynta u bnai hi kin pyndep noh ia ki kyndon na ka bynta ban pyntreikam pura noh ia kane ka aiñ. Kumta ngi khmih lynti ba naduh u bnai ban wan kane ka aiñ kan sa treikam pura noh,” la ong u Bah Commander.
