Ka National Aeronautics and Space Administration (NASA) hynnin ka sngi, ka la pynbna ba lada ka Boeing Starliner kam long shuh kaba shngain, ki ar ngut ki nongshang haw haw, lane kita ki Astronauts ba kynthup ia ka Sunita Williams bad u Barry Willmore, kin nym lah ban wanphai biang sha ka sla pyrthei tad haduh bnai Rymphang jong u snem 2025.
Ha ka jingshisha, ka jingthmu ba nyngkong ka long ba kitei ki ar ngut ki nongshang haw haw, kidei ban leit tang kumba phra sngi sha ka International Space Station (ISS), hynrei na ka daw jong kiba bun ki jingthut bad katei ka liengsuin Boeing Starliner ba kynthup naduh ka ‘propulsion system’ bad ka ‘helium leaks’, la hap ban bteng biang sa kumba phra bnai eiei ka jingsah sha haw haw, naduh ba la pynher iaka na ka sla pyrthei ha ka 5 tarik jong u bnai Jylliew, 2024.
Katei ka liengsuin Boeing Starliner kaba la pynsangeh (docked) ha ka ISS, kala dei ban wanphai biang sha ka sla pyrthei myn ha ka 26 tarik jong u bnai Jylliew, 2024, hynrei na ka daw jong ka jingthut katei ka liengsuin kaba ki pyndonkam, ki la hap ban sahkut noh sha katei ka haw haw tad haduh ba la lah ban pynbit pynbiang bad pynbha biang iaka.
Na ka liang ka NASA, ka la pyrkhat ruh ban pyndonkam da ka SpaceX’s Dragon Capsule, kaba dei kata ka liengsuin Commercial Crew Program (CCP) ban wan pynpoi biang ia kitei ki ar ngut ki nongshang haw haw sha ka sla pyrthei bad lada kane kan urlong, kin dei kiba nyngkong eh ban pyndonkam ia katei ka jait liengsuin ha u bnai Rymphang jong u snem 2025.
Shuh shuh la ioh jingtip ruh ba ka jingsahkut ha katei ka haw haw, ka koit ka khiah jong kitei ki ar ngut ki nongshang pyrthei ka don ha ka jingma. Katkum ka jingioh jingtip, la iathuh ba ka Sunita Williams, ka don ia ka jingshitom ha ki shyieng namar ka jingdon slem ha katei ka haw haw kaba la tip kum kata ka ‘microgravity’ bad ba kane kan nang pynjur shuh shuh ia jingshitom bad buh jingma ruh wat ia ka jingsniew jong ka DNA ka jongka bad kiwei kiwei de ki bynta jong ka met kumba la kynthoh da ka khubor The Indian Express.
Ha kawei pat ka jingpynbna ha ka sngi Ba ar, ka NASA kala iathuh ba la hap ban pynsangeh shwa shipor ia ka liengsuin SpaceX capsule ban pynher sha ka ISS hadien shi bnai, khnang ba yn ioh ban khmih bniah shwa ia ki jingthud kiba iadei bad ka liengsuin Boeing Starliner.
Ia katei ka liengsuin SpaceX capsule, ha ka jingshisha la thmu ban pynher sha ka haw haw ISS ha ka 18 tarik u Nailar, 2024, hynrei la hap ban pynsangeh noh tad haduh ka 24 taril u Nailur, 2024. Na ka liang ka NASA ka la pynthikna ruh ba kan phah tang ar ngut ki nongshang haw haw lyngba kane ka liengsuin, khnang ba ka Sunita Williams lem bad u Barry Willmore ki lah ban wanphai ryngkat sha ka sla pyrthei.
