Shillong Nailar 9: Ka kynhun jong ki nongñiah kali kiba ju kit bad shalan ia u shyiap bad maw hapoh ka jylla Meghalaya, ki la shim da kawei ka rai ban ieng pyrshah ia ka kyndon aiñ ba la pynmih da ka sorkar jylla ia kaba la tip kum ka Meghalaya Mineral Preventions of Illegal Mining Transportation & Storage Rule 2022.
Ia kane ka rai, kane ka kynhun ki la shim ha ka jingialang kaba la long ha ka shnong Umphyrnai bad ki la rai ruh ban iaid ban kit ia u maw bad shyiap khlm ka challan halor ka nongrim ba kim die ne shalan shabar jong ka jylla Meghalaya ia kine ki mar poh khyndew.
Kane ka kynhun hapoh ka lama jong ka Truck Owners and Driver Association (TODA) ba la lamkhmat da u Bah Egenstar Kurkalang kum u President, ha ka jingialang ki la ther tyngeh ia ki bor ka sorkar jylla Meghalaya da kaba ong, ba ka sorkar jylla ka la pynmih ia katei ka kyndon aiñ khlem ka mon u paidbah ne ka jingiatai ba sani hashwa ban pyntreikam ia kane ka aiñ.
U la ong ruh, ba lada kane ka aiñ ka dei kata ka añ kaban iada ia ka mei mariang ne ia ka khyndew ka shyiap, te ngi kloi ban burom ia ka hynrei kumba la sakhi haduh mynta kane ka ain ka dei tang ka jingkhrong khajna na u paidbah u duk u suk u ba im kamai jakpoh na kane ka kam ban die ia kine ki marpoh khyndew, kumta ngin bteng beit ia ka jingshalan khlem da shim ia ka challan namar ba ngim die ne shalan shabar ka jylla haduh kine ki sngi.
“Ngin bteng ban shalan ia u maw u shyiap kumba ju long bad ngim pdiang ia katei ka ain namar la kynthup lang ia ngi kiba shalan maw bad shyiap kum kita ki nongshalan dewiong, mawshun bad kiwei kiwei kiba ju shalan shabar ka jylla bad shen na ka liang ka kynhun jong ngi ngin sa leit buh ia ka dorkhas ban weng ia kane ka ain kaba la ktah ia ki trai bad nongniah kali kiba kit bad shalan maw shyiap hapoh ka jylla”, ong u Bah Kurkalang da kaba bynrap, ba ngi pyndonkam hi ia ki maw bad shyiap bad ka sorkar jylla hi ruh ka pyndonkam ia kine ki marpoh khyndew.
Kumban kdew, ba dang shen ka kynhun jong ki nongniah bad trai kali hapoh ka lama jong ka TODA ki la pynpaw a ka jingsngewkhia kaba khraw halor ka jingpyntreikam ia ka Meghalaya Mineral Preventions of Illegal Mining Transportation & Storage Rule 2022 lyngba ka tnat Forest da kaba khang bad pynwit ia ki kali kiba kit maw bad shyiap.
