Guwahati, Nailar 9: Da ki spah ngut ki paidbah nongshong ki la mih paidbah hapoh ka Tinsukia ban khang lut ia baroh ki jaka rung jaka mih ba pyniasoh ia ka Assam bad Arunachal border kiba la iakhih hapoh ka Tinsukia District kaba la wanrah ia ka jingeh ia ka leit ka wan bad ka rung ka mih jong kine ki ar tylli ki jylla.
Ki paidbah kiba la pynpaw ia ka jingbitar halor ka jingshah pyniap jong u wei u heprit ba dang 12 snem hadien ba ki runar ki la kitnap ia u ha ka 22 tarik Naitung na Sadiya ha Arunachal katba u dang leit phai sha iing na skul, bad ki paidbah ki la mih ban dawa ia ki bor ka aiñ ban pynshitom tyngeh ia kiba donkti ban kitnap bad pyniap ia u ne u heprit.
Ia kane ka jingiakhih, la lamkhmat da ka kynhun jong ka Gurkha Student Union jong ka Tinsukia District Committee, ha kaba ki la khang lut ia ki jaka rung jaka mih ha Shantipur, Chunpura, Bordumsa, Jagun’s Namchik, Jairampur, Namdang, Kakpathar’s Dirac Gate.
Lah ban kdew, ba ki pulit ki la lap ia ka metiap jong u wei u heprit ba la shah kitnap ba la tip kyrteng kum u Rohit Chettri hadien ba ki runar ki la pyniap bad tep ia ka met jong u ha kawei ka thliew kaba don kumba 800 meter na ka jaka ba la kitnap ia u ha Kalikhola, Arunachal Pradesh ha ka 31 Naitung hadien ka jingphla jong ki arngut kiba la shah kem halor ka jingkitnap bad pyniap ia u ne u heprit.
