Ka long ka khubor kaba sngewtynnad bha ia ki nongtrei ka tnad ka koit ka khiah ha Civil Hospital Nongpoh ha kaba mynta ka sngi la lah ban plie paidbah noh ia ka ophis ka DMHO da u myntri rangbah ka jylla u Conrad K. Sangma ia kane ka ophis treikam bad shen ka DMHO bad ki nongtrei kin sa kynriah noh ia ka jaka treikam sha kane ka ophis ba thymmai.
Kaei kaba kham sngewtynnad shuh shuh, ka long ba u myntri rangbah ka jylla, u Conrad K. Sangma u la pynbna ba ia katei ka ophis treikam barim ka DMHO yn pynlong noh ka jaka treikam na ka bynta ka Trouma Centre ba shen kin pyntreikam noh ia kane ka trauma centre ban ioh jingmyntoi ki piadbah khamtam ka Ri Bhoi ka dei ka khyrdop jong ka jylla ba rung lyngba ka surok national higway-6 ha Ri Bhoi.
Haba plie ia katei ka ophis ba thymmai ka DMHO ha Nongpoh, nalor u myntri rangbah ka jylla, u Conrad K. Sangma la don ryngkat ruh ka myntri ka tnad ka koit ka khiah ka Dr. Amapreen Lyngdoh, u MLA ka Nongpoh u Bah Mayral Born Syiem, u Deputy Commissioner ka R Bhoi u Abhilash Barwanwal, ka DMHO ka Dr. Angel Kharduid bad kiwei kiwei ki ophisar bad ki nongtrei sorkar.
U Myntri rangbah ka jylla u Conrad K. Sangma u la pynpaw ka jingkmen ba la ioh ban plie paidbah ia kane ka ophis DMHO ha Nongpoh ba la dang naduh u snem 2021 bad ba la mang tyngka haduh T. 18.4 klur.
U la ong ruh ia ki nongtrei na ka ophis DMHO na Civil Hospital Nongpoh yn pynkynriah noh sha kane ka ophis ba thymmai bad katei ka ophis ba rim yn buh noh ia ka Trauma Centre ban pyntreikam noh kumba la angnud da ki paidbah ka Ri Bhoi.
U la pynpaw ruh ïa ka thong ka sorkar jylla ba ka la mang pisa haduh T. 70 klur na ka bynta ban pynbit pynbiang ia ki 80 tylli ki jaka ai jingsumar ha ka jylla ba kynthup naduh ki jingdonkam bapher bapher bad ia kane yn sdang shuwa na ki 3 tylli ki jaka ai jingsumar ba kham heh kata ha Shillong, Jowai bad ha Tura.
U la iathuh ruh ym tang kitei ki jaka ai jingsumar ba ka sorkar ka la mang tyngka, hynrei yn dang mang tyngka shuh shuh na ka bynta ban pynbiang ia ki jaka treikam ki nongtrei ka koit ka khiah bad ruh ki Quarter nalor kiwei kiwei ki kor ki bor kiba ia dei bad ka juk ba mynta na ka bynta ban ai ka jingsumar kaba paka tam sha ki paidbah ka jylla, u la bynrap.
