Ka Ministry of Finance jong ka sorkar pdeng ka la mynjur ïa ka mang tyngka kaba long T. 2,000 klur na ka bynta ban tei ïa ki surok haka jylla Meghalaya haka wat kaba ar jong ka Meghalaya Integrated Transport Project (MITP), kaba tip mynta kum ka Meghalaya Economic Growth Accelerator (MEGA) Corridor Project.
Kane ka jingmang pisa ka long hadien ka jingjop jong ka jingpyntreikam haka wat ba nyngkong jong ka MITP. U Myntri Rangbah duh ka jylla Meghalaya u Conrad K Sangma, ha ka jingkynduh bad ka Myntri ka tnad mang tyngka jong ka sorkar pdeng, ka Nirmala Sitharaman ha ka 24 tarik u Jylliew, 2024, u la aiti ïa kane ka projek bad kyrpad ruh ka jingdonkam ban kyrshan pisa shuh shuh. Ka sorkar jylla ka ai ruh ka jingkhublei ïaka sorkar pdeng kaba la shimkhia bad mynjur ïaka mang pisa naka jingkyrpad jong u Myntri Rangbah.
Ka jingpyntreikam jong ka wat ba nyngkong jong ka MITP, ka World Bank kala mang pisa haduh 880 klur bad hapoh kane ka projek, la dep ban shna ïaki surok ba donkam kum ka Baejendoba-Resubelpara-Mendipathar-Damra, Shillong-Diengpasoh bad Pasyih-Garampani bala ai jingiaroh ruh da ka World Bank bad ka Ministry of Finance.
Hapoh ka wat ba ar jong ka MITP (Mega Corridor) Project palat 300 km yn tei ïaki surok ba heh ki ban ïasoh ïaka Shillong, Tura, Jowai bad Dawki nalor ka jingpyrkhat kyrpang ïaki surok ba pyniasoh sha New Shillong Administrative Citiy, New Shillong Knowledge City bad kane kan pynkylla bad pynkiew ïaka nongbah Shillong bad kumjuh ruh sha kiwei kiwei ki jaka ba kham kyndong jong ka jylla.
Kine ki jingpyrshang hapoh ka MEGA Corridor Project, ki pynïasoh lang bad ki projek ba dang tei kum ka Shillong Dawki Corridor (NH 106 & 206), Tura Dalu Road (NH 217), Phulbari sha Goeragre Road (NH 127B), Dhubri-Phulbari Bridge kin weng ïa ki jingeh ha ka roi ka par ha ka jylla, ban pynlong ïa ka kum ka jaka khaii kaba heh ha ka thaiñ, kaba ai jingkyrmen ban pynkiew ïa ka jingïoh kaba long USD 10 Billion shuwa u snem 2028.
