Ka Chief Executive Officer barim jong ka kompani Youtube, ka Susan Wojcicki, kaba dei ruh kawei na ki nongtrei ba mynshwa jong ka kompani Google, ka la khlad noh mynta ka sngi na ka jingshitom bampong ha u tor kaba la ban la kumba ar snem lynter.
Ia kane ka jingkhlad jong ka Susan Wojcicki kaba la 56 snem ka rta, la pyntip da u lok jong ka, u Dennis Troper lyngba ka Facebook, uba la iathuh thoh “Da ka jingsngewsih kaba khraw nga kwah ban iathuh shaphi baroh ba ka lok ba ieid jong nga kaba nga la iashong la 26 snem, kaba dei ruh ka kmie jong 5 ngut ki khun ka la khlad noh hadien ka jingshitom ha ki tor kaba la neh kumba 2 snem”.
U Dennis Troper u da ka mynsiem jong ka jingsngewsih u la ong ruh ba ka Susan Wojcicki kam dei tang ka paralok kaba ieid ha ka jingim ka jong u, hynrei kadei ka briew kaba stad, ka kmie kaba don ia ka jingieid bad kaba long ka paralok kaba iajan ia baroh.
“Ka jingkhlad noh jong ka Wojcicki ka ktah ia ka iing ka sem jong ngi bad ia ka pyrthei ba ym lah shuh ban thew. Ngi sngewsih, hynrei ngi sngewnguh ia ka por kaba ngi la ioh bad ka, sngewbha buh ia ka iing ka sem jong ngi ha ki jingduwai jong phi katba ngi dang iaid lyngba ia kane ka por kaba eh” la ong u Troper
