Uwei u nongshong shnong ka Shnong Narbong ha ka thain Byrnihat mynta ka sngi u la wan ban ujor sha ka Byrnihat Police Outpost, kaba dei hadien ka jingshahtuh ka Thuk thuk Yamaha jong u, na ka jaka kaba u pynieng ha ka ingsah jong u ha ka shnong Narbong.
Kane ka jingjia ka la la jia ha ka shnong Narbong ba hap ha Byrnihat Police Outpost, ha kaba la iathuh ba ki runar ki la wan ban rong tuh ia ka Thuk thuk Yamaha R15 (R15V4), kaba rong iong na katei ka jaka sah, kaba la antad ki la wan ban tuh dang step phyrngap.
Une u ba la wan ban ujor sha Byrnihat Police Outpost halor ka jingshah tuh katei ka Thuk thuk Yama, la tip kyrteng kum u Pradeep Kumar Singh naka shnong Narbong. Hadien ba la sngewthuh ba la shah tuh kane ka thuk thuk Yamaha mynta ka sngi u la wan ban ujor ha ka por 1 baje mynta ka sngi, ban pyntip sha ki bor pulit halor ka jingshah tuh katei ka thuk thuk Yamaha.
Kumba la iathuh da utei u trai katei ka thuk thuk Yamaha, la ong ba ha ka por 1 baje mynstep u dang iohi ba katei ka thuk thuk Yamaha ka dang don ha katei ka jaka ba u pynieng, hynrei ha ka por mynstep pat la lap ba katei ka thuk thuk ka la shah rong tuh noh ha ki runar.
Shuh shuh, halor kane ka jingshah tuh katei ka thuk thuk, la pyntip ruh sha ka PCR Nongpoh ban pynphriang ia ka khubor sha baroh ki Police Station ba don ha National Highway-6 bad la pyntip ruh sha ki bor pulit na Assam ba kin peitngor na ka bynta ban ioh kem ia kitei ki runar kiba la wan ban rong tuh ia katei ka thuk thuk Yamaha, ong ka tyllong khubor na ki Pulit ka Ri Bhoi.
