U M Hogue uba dei u Chancellor ka University of Science and Technology, Meghalaya (USTM) mynta ka sngi u la kyntait mardor ia ka jingkynnoh u myntri rangbah ka Assam u Himanta Biswas Sharma, ba ka jingshlei um sha Guwhati ka dei kaba jingtuid ka um na katei ka skulbah kumba la paw dang shen ha ki lad pathai khubor ka jylla Assam.
Haba kyntait ia katei ka jingkynnoh u myntri rangbah ka jylla Assam, kam dei satia ba la kyntait tang da u chancellor ka USTM, hynrei naduh ki Nongtrei (Faculty members) bad ki samla pule ruh ki la pynrem jur ia katei ka jingkynnoh u myntri rangbah ka jylla Assam da kaba ong ba kam don Nongrim satia bad khlem da wad ia ka jingshisha.
U chancellor ka USTM bad kynthup ruh ki nonghikai ryngkat ki samla pule, ki la ioh lad ban pynshai bad ruh ban pynrem halor katei ka jingkynnoh u myntri rangbah ka jylla Assam, ka dei hadien ba mynta ka sngi na ka liang ki nongthoh khubor na Meghalaya ki la leit ban jurip ia katei ka skulbah na ka bynta ban wad jingshai halor katei ka jingshahkynnoh ba ka jingshlei um sha Guahati ka dei kaba tuid ka um na katei ka skulbah bad ruh kaba ktah na ka jingtih khyndew na kitei ki lum.
Ha kane ka sngi, na ka liang u Chancellor ka USTM, u M. Hogue, u la pynshisha ia katei ka jingkynnoh da kaba u la ialam ia ka kynhun ki nongthoh khubor, ban pyni halor ki lad ki lynti ba katei katei ka skulbah kumno ka iada ia ka mairang bad wat ka um ba tuid na katei ka skulbah ruh kam shym la tuid sha ka surokbah lait noh tang ki bynta ba hakhmat ka skulbah kata ruh la leh da ka nala um kaba paka.
Ban pynshisha halor katei ka jingshah kynnoh, u la ialam ruh sha ki ar tylli ki pung kiba ki pyntuid ia ka um kaba mih na katei ka skulbah bad ka um kam shym la tuid sha surok bad ka jingkynnoh u myntri rangbah ka jylla Assam ka long kaba khlem Nongrim satia. Nalor kata u la iathuh ruh ba wat ia ki jaboh ba mih na katei ka skulbah ruh ki don la ka jaka ban bret ia ki jaboh bad nalor kata jan baroh ki jaka hapoh katei ka skulbah la thung da ki dieng bad ha katei ka jaka ka jingjyrngam lah ban iohi tang ha phyllaw katei ka skulbah bad ki bynta ba tih lum tih khyndew kim dei satia ka jaka jong katei ka skulbah USTM.
Kumba la pynpaw naduh u chancellor, ki nonghikai bad ki samla pule, kaba khtam khtah shuh shuh halor ka jingkynnoh u myntri rangbah ka jylla Assam, kad ei kaba u pyndonkam da ka ktien niam ‘Flood Jihad”. Ha kaba kane ka jingkynnoh jong u ka la ktah ia ka jingsngew jong baroh ki nongtrei, ki samla pule bad khamtam ma u kum u Chancellor, namar ka jingdon katei ka skulbah kam dei na ka bynta ka niam bad ka dei na ka bynta ban kyntiew ia ka pule ka puthi ki samla ym tang na ka jylla Meghalaya bad Assam bad na ki jylla ka thain shatei lam mihngi ka ri India bad haka ri India hi baroh kawei.
