Ki kudam buh kyiad lane ki Bonded Ware House ki shem jingeh ban ioh jingbit lane transit Pass na ka Sorkar Assam ban pynpoi ia ki mar mata sha ki thain ka Garo Hills, namar ba ki kali Meghalaya ki hap pyndonkam ban iaid lyngba ki surok ka Jylla Assam ban pynpoi ia ki mar mata sha ki thain Garo Hills.
Ia kane la pyntip da u Myntri ka tnat Excise u Bah Kyrmen Shylla bad u la ong ruh ba ki jaka buh mar mata lane ki kudam (Bonded Ware House) ha ki thain Garo Hills ki la dep phah jingthoh shaka Sorkar Meghalaya haba ia dei bad ka jingkyntait ka Sorkar Assam ban ai jingbit lane Transit Pass.
Haba kren sha ki lad pathai khubor u Bah Kyrmen ula iathuh baka tnad kan sa phah da ka jingthoh sha ka Sorkar Assam ban tip ia ki daw ba shah pynthut ki Transit Pass ban pynpoi iaki mar mata sha ki thain Garo Hills.
“Hynne ka sngi nga la lum ka jingialang bad ki ophisar ka tnat Excise ban ia kren halor ka jingshem jingeh ki kudam na ki thain Garo Hils ban ioh jingbit lane Transit Pass ban pynpoi ia ki mar mata shaki Bonded Ware House” la ong u Bah Kyrmen.
U Bah Kyrmen u la kam ba kane ka dei ka sien nyngkong ba ki kudam ki shem jingeh ban ioh Transit Pass naka Sorkar Assam ban iaid lyngba ki thain jong kane ka Jylla ban pynpoi shaki thain Garo Hills.
U la iathuh ba haka 7 tarik Nailar kawei ka Bonded Ware House ka la thoh sha ka tnat Excise ban pyntip baka Sorkar Assam ka khlem ai jingbit lane Transit Pass ban pyndonkam iaki surok jong katei ka Jylla ban pynpoi iaki mar mata sha Garo Hills.
“Hooid ka Jylla ka don ka surok Shillong-Tura ban poi sha Garo Hills hynrei ka jinglut ka long arshah lada nujor haba pyndonkam daka surok napoh ka Jylla Assam bad dei namar kane, ka tnat kan shim khia ban pynbeit ia kane ka jingeh ban ioh Transit Pass khnang ban pynduna iaka jinglut jong ki Bonded Ware House” ula ong.
Haba pynpaw ka jingsngewkhia halor kane u Myntri ka tnat Excise ula ong “Naka liang ki Ophisar ka tnat ki la leh iaka ba donkam bad kum u Myntri ruh ngan sa phah daka jingthoh sha u Myntri ka tnat Excise ka Sorkar Assam ban pynbeit halor kane”
