Shillong, Nailar 13: Uwei u nongtrei jongka Meghalaya Legislative Assembly, u la khlad kyndit noh hala ka jaka shong jong u bad suba ba katei ka jingiap ka jong u, kadei na daw jong ka jingdih palat ia u drok lane kaba ki ong ‘over dose’ ha ka ktien nongwei.
Utei u nongtrei ka Assembly u dei uba la tip kyrteng u Lachuman Shrestha bad uba trei kum u Chowkidar jong ka Meghalaya Legislative Assembly.
La iohi ba une u nongtrei u shong iap ha ka shuki treikam jong ka ophis bad la lap ruh ia u thyrnia uba dang sahkut hapoh ka kti ka mon nalor u drok hajrong ka miej treikam.
Ia ka met jong utei u nongtrei, la pynkit noh sha Civil Hospital Shillong na ka bynta ban pyndep ia ka post mortem bad naka liang ki Pulit ki dang pynlong ka jingtohkit halor kane ka jingjia.
