Khliehriat, Nailar 13: Ka MLA jong ka Sutnga Shangpung konstitwensi, ka Santa Mary Shylla hynnin ka sngi ka la pynlong ia ka jingleit jurip ia ka surokbah National Highway 6 kaba la julor dap da ki thliew ki syar, khamtam hadien ka jingther jong u lapbah ha kine ki khyndiat taiew bad bnai ba lah dep.
Ha kane ka sngi, la iadon ryngkat ruh da u Deputy Commissioner ka East Jaintia Hill, u Shivansh Awasthi, u Superintendent of Police ka East Jaintia Hills, u Giri Prasad, u Project Director ka National Highway Authority of India (NHAI) nalor kiwei kiwei de ki heh ophisar jong ka district.
Kumba kane ka surok ka sniew haduh katta na ka jingther jong u slap, ki bor ba dei khmih jong ka NHAI ki la bthah ban pynbun ia kip uh shilum ban don ha kylleng ki bynta jong ka surok kiba ju jia khah khah ka jingtwa khyndew kum ha Lumshnong, Sonapur bad Kuliang, na ka bynta ban weng ia ki khyndew kiba twa bad ban nym don ka jingdheng kali kaba jur kumba la dep jia ha ki por ba lah dep.
Na ka liang ka Santa Mary Shylla, ka la kyntu ruh ia ki bor jong ka NHAI ba kin shimkhia mardor ban maramot ia katei ka surokbah, khamtam ban pyndap ia ki thliew ki syar, ban pynbiang ki nala pyntuid um bad ruh kiwei kiwei de ki bynta ban iada na ka jingsniew shuh shuh jong katei ka surok kaba la jot rathai.
Na ka liang ki bor jong ka NHAI ruh ki la kular ban shimkhia ia katei ka kam, da kaba pyntip ba tang mar ia kut kane ka aiom slap, kata hadien kumba ar bnai eiei, ka jignsdang ban maramot bad siang rong thymmai ia katei ka surokbah kan sdang, khang ban pynsuk ia ka leit ka wan ki paidbah kiba la mad jingeh baroh shi katta.
Shuh shuh, na ka liang jong ka NHAI ka kyrmen ba ia ka jingmaramor bad siang rong thymmai ia kane ka surok, yn lah ban pyndep la kumno kumno ruh hashwa jong u bnai Lber, 2025.
