Ki lai tylli ki seng bhalang ba kham paw ha ka jylla ba kynthup ia ka Khasi Students’ Union (KSU), ka Federation of Khasi Jaintia & Garo People (FKJGP) bad ka Hynniewtrep National Youth Front (HNYF), mynta ka sngi kila pynpaw biang ka sur ban dawa ia ka jingbishar kaba hok halor ka jingshah siat iap u General Secretary barim ka Hynniewtrep National Liberation Council (HNLC) Bah Cherishterfield Thangkhiew.
Hynne ka step, ki lai seng kila pynkynmaw ia kane ka jingdawa daka ba pynlong ia ka jingwah lama iong bad poster ha kylleng ki jaka ha thain Mawlai, Motphran, Khyndai Lad ter ter shaduh Laitumkhrah.
Nalor ki lama iong, ki lai seng kila war ruh iaki Banner bad Flex kiba thoh ki jingthoh pynrem iaka Sorkar Jylla.
Katto katne na ki banner kila ong “Ngi kwah ia ka jingbishar kaba hok”, “Becareful when you’re sleeping, you might be shot by the government”, “U kuli Sorkar u treikam tyngeh tang na bynta ki ba dawa ia ka hok u Khasi” bad “Ka snam Khasi kam shongdor hakhmat ka Sorkar”.
