Ka skulbah USTM haka sien ba 3 snem kynthih ka la ioh ia ka lad ban rung biang hapdeng ki 200 tylli ki skulbah kiba bha tam jong ka ri India ha ka jingpynbna kaba 9 jong ka National Institutional Ranking Framework (NIRF) 2024 kaba la pynbna hynnin ka sngi da u myntri ka tnat pule puthi ka sorkar pdeng u Dharmendra Pradhan.
Ka USTM ka dei tang ma ka ka skulbah shimet ha ka thain shatei lam mihngi kaba la ioh ia kane ka kyrdan haka sien kaba lai bad kane ka jingbuh kyrdan ba la pynmih man la u snem ka bishar bad buh kyrdan ia ki jaka pule ba kham paw bad shakhmat ha India katkum ki kyndon bapher bapher ba kynthup naduh ka jinghikai bad ki lad jingïarap, ka jingwad bniah bad ka jingtreikam ba tbit, bad kiwei kiwei.
Ka USTM ka dei ka skulbah kaba la ioh ia ka accreditation “A Grade” hadien ka jingbishar bniah da ka NAAC ha u snem 2021. La ithuh ruh ïa katei ka skulbah kum ka Green Campus, kaba dei ruh kawei na ki jingangnud ba hakhmat eh jong ka NAAC, kum ka kynhun jong ka Ministry of Education, ka Sorkar India.
Ka tei ka skulbah ka la trei khlem sangeh ban pynurlong ia ka thong jong ka ban long kum kawei naki jaka pule kaba pawnam ha ka pyrthei. Ka la wanrah ia ka Pay Back Policy kaba kyrpang ban pynshlur iaki samla pule ban pyndep ia ka NET, GATE, SLET, IAS, lane kino kino ki eksamin ba ha khlieh duh bala pynlong da ka Sorkar Jylla bad sorkar pdeng Hapoh kane ka polisi, ki samla pule jong ka USTM kiba pass ia kine ki eksamin ki ioh biang ia ka bai lut jong ki na katei ka skulbah.
Halor katei ka jingrung biang ka skulbah USTM hapoh ka thup ki 200 tylli ki University ba paw haka ri naka liang ki bor pyniaid katei ka skulbah kila pynlong ruh da ka jinglehkmen halor katei ka jingjop jong katei ka skulbah.
