Nongpoh, Nailar 13: Ka Hynniew-trep Achik National Movement HANM Ribhoi District hapoh ka jingïalam Jong u Bah Donroi Kshiar kum u President bad u Bah Wanteribor Assistant Secretary lem bad ki dkhot na Ribhoi District ki la ïoh ban pdiang pat sa kumba 30 ngut tam ki samla kiba la wan ban pynïasoh ïalade sha ka Seng HANM.
Ïa katei ka jingïalang ban pdiang ïaki samla kiba la wan ban pynïasoh thymmai sha ka seng HANM la pynlong mynta la sngi ka 13 tarik Nailar ha Palm Hotel, Nongpoh hakaba la ïa donlang daki nongïalam ka Seng naduh u President, Secretary lem bad ki dkhot Jong ka Ribhoi District.
Haba kren naka liang u Bah Donroi Kshiar kum u President u la pynpaw ïaka jingkmen ba ka seng HANM ka la sdang ban khie im biang katba nang mih ki sngi ha kaba la sakhi mynta ka sngi ïaka jingpynrung ïaki dkhot ki ba thymmai kaba la kot shaduh ka 30 ngut tam.
U Bah Donroi u la Ïathuh ruh ba ha ki kam Seng ka ju don ki kynrum kynram bad kumba la sakhi ha ki bnai ba la leit ka la mih ruh ka kynrum kynram hapoh ka Ïing Jong ka HANM, hynrei kum u nongïalam ba thymmai Jong ka District u don ïaka mynsiem ban shakri bha ym tang ïaka Seng hynrei kumjuh ruh ïaka Jaitbynriew baroh kawei.
Shuh shuh u la ong, Kane ka long tang ka jing sdang ban pynrung ïaki dkhot kiba thymmai hapoh ka ïing Jong ka HANM, Ribhoi bad naka liang ka Seng kan sa nang pynrung shuh shuh ïaki dkhot ha kine ki taïew ki ban sa wan.
