Nongpoh,Nailar 13: u Bah Ransom Sutnga, Chairman ka MIDC Jong ka Sorkar jylla kum u kongsan hynne ka sngi ka 13 tarik Nailar, 2024 u la plie noh ïaka lympung ïalehkai ball kaba la tip kum ka 3rd Division Ribhoi League Jong u snem 2024 ha madan ïalehkai jong ka shnong Umsning Nonngjri, Ribhoi District.
Ïa katei ka lympung ïalehkai ball la pynlong daka Ribhoi District Sports Association RBDSA kaba long ruh kum kawei naki lympung ha shwa ban ïoh rakhe ïaka jingïaid lynti kaba 50 snem Jong ka Ribhoi District Sports Association.
Ha katei ka sngi Plie ban ïa sakhi lang ïaka jingïalehkai hapdeng ka kynhun Raitong pyrshah ïaka Nongbah Mardon, ka nalor u bah Ransom Sutnga kum u kongsan la ïa donlang ruh da u President ka RBDSA bah RB Shadap, Bah P Nongrum Vice President, D Ryntathiang General Secretary, RR Makdoh Advicer lem bad kiwei kiwei ki riew rangbah.
Haba phai pat sha katei ka jingïakhun ban knieh ïaka nam jop ka jingïalehkai hapdeng kitei ki ar kynhun ka la long shisha kaba itynnad bad kaba shongshit ban peitkai.Hakaba kut kapor ka Raitong ka la lah ban pynliem noh ïaka Nongbah Mardon da 2 kol la 1 kol.
Hadien Jong kane ka jingïalehkai kaba nyngkong yn ïakhun pat ka Rtiang pyrshah ïaka Khlieh Umtrew.
Ha katei ka sngi plie ïa ka lympung 3rd Division, Ki Nongïalam jong ka RBDSA ki la ïathuh ba kan sa don ruh sa 3 tylli ki lympung Jong ki shynrang ki ban sa ïoh ban sdang ha kine ki sngi kiba kynthup ïaka 2nd Division, 1st Division bad ka Super League Division hapoh ka them Ribhoi bad ka don ruh ka lympung naka bynta ki khynnah khynthei ka Women’s League.
