U Myntri rangbah ka jylla, u Conrad K. Sangma mynta ka sngi ba ar jong ka taiew kum u kongsan u la leit ban plie paidbah noh ia ka Oyster Mushroom Cluster ha Mendipathar ba hap hapoh ka North Garo Hills.
Ia kane ka projek la tei ha ka jnglut kaba la kot sha ka T. 10 klur, kaba dei kawei na ka thong ka sorkar ban pynshlur ia ka jingrep Tit bad lyngba kane ka projek kumba 1000 ngut ki nongrep tit kin sa ioh ia ka jingmyntoi, kaba dei ha kane ka wat kaba nyngkong.
Ia kane ka projek ban thung Tit yn pyntreikam da ka Mendipathar Multipurpose Cooperative Society, ba la ialam da ka Sister Rose bad ruh la mang tyngka ruh da ka skhim SFRUTI na ka MSME bad kumba T. 3 klur yn kyrshan da ka sorkar Meghalaya.
Ha ba kren ha kane ka sngi u myntri rangbah ka jylla u Conrad K. Sangma u la ong ba ka jingdawa ia u Tit ka dei ka jingdawa ha kylleng ki ri ka pyrthei bad ka jingwan rah kum kane ka shnat treikam kan iarap shibun ia ki nongrep. U la ong ruh na ka liang ka sorkar jylla ruh ka la shim khia ban pyntreikam shibun tylli ki prokram ban kyrshan ia ki nongrep.
Shuh shuh, kum ka jingai mynsiem ia ki nongrep Tit hapho ka jylla, u Conrad K. Sangma, u la ong ba ka sorkar jylla kan sa shim khia bad khamtam ban ai jinghikai kyrpang bad ban ai ka jingkyrshan ia kino kino ki riewshimet ne ki kynhun kiba kwah ban kyntiew ia ka ioh ka kot lyngba ki kam rep Tit.
