Kawei na ki shlem ai jingnang jingstad ha ka them Ri Bhoi District kaba la ju tip kum ka Christ College, kaba don ha ka Shnong Umroi Umeit, Ri Bhoi District mynta ka sngi ka 14 tarik Nailar ka la ïoh ban rakhe lypa ïaka sngi laitluid jong ka Ri kaba 78 lane ka Pre Independence-Day ha kajuh ka sngi ka la ioh ruh ban rakhe ïaka sngi Foundation Day jong katei ka College.
Ha katei ka sngi la wan ban shim bynta lang ha katei ka jingrakhe da U Bah Charles Marngar MLA ka Mawhati kum u kongsan, u ba la ai mynsiem bad jingiaroh ia ki Nongpyniaid jong katei ka shlem bad kumjuh ka jingsneng jingkraw bad kyntu ia ki khun samla pule kiba pule ha kane ka shlem, lyngba da ka jingkren lyngkot kum u kongsan ha kane ka sngi.
La ia shimbynta lang ruh da ki bor pyniaid ia katei ka shlem kiba kynthup ia ka Sister Smruti kaba dei ka Head Administrative jong ka Christ College, ka Sister Dr.Grace Rose, kaba dei ka Principal, ki Nonghikai lem bad ki khun samla pule kiba la shim bynta lang ha kane ka sngi bad la pynphuh iphieng bad pynshongkun hakane ka jingrakhe lyngba da ki sur jingrwai, ki jingshad bad kiwei kiwei ki prokram.
Haba kren ha kane ka sngi naka liang u ongsan Bah Charles Marngar, u la ong, ka sngi laitluid ka dei ka por ban pyrkhat bad pynthymmai ïaka jingmut jingpyrkhat hakaba ka pynkynmaw ia ngi ia ki jingaiti jong ki riew shimet bym lah khein kiba la ïaleh pyrshah bad ki dohlieh ban pynïoh ïaka jinglaitluit.
Shuh shuh u la ong, kum ki Nonghikai ngi dei ban don ka bynta kaba kongsan ban jingpynshlur ia ki khynnah pule bad ban ai mynsiem ia ki samla pule jong ngi ban long ki nongshong shnong kiba pyrkhat bad kiba don ka jingkitkhlieh.
U Bah Charles u la ong ruh, kane ka sngi ka long kum ka jingburom ym tang ia u Kpa jong ka Jaitbynriew hynrei wat ia baroh ki nongialam ba khraw ha kylleng ka pyrthei. Katba ngi dang pyrkhat ia ki jingjop kiba phylla lyngba ka jinglen lade ki riew khraw, ngi ruh ngi don ïaka bynta ba kum ki nongshong shnong kiba don ka jingkitkhlieh jong ka jaitbynriew ngin long kiba ïa tylli khnang ba ngin nang lah ban kyntiew ïaka jylla bad ïaka ri hi baroh kawei.
