Kum ka jingburom ia ka jingdap 78 snem ba ka ri India ka la ioh ia kata ka jinglaitluid na ka jingsysnhar ki British, ka party BJP na ri Bhoi ryngkat ka ABVP mynta ka sngi ka la rakhe da kaba iaid paidbah ban rah ia ka lama lai rong ka ri India kaba la sdang na Ri Bhoi College bad pynkut shajan ka ophis u District Sport Officer ka Ri Bhoi ha Nongpoh.
Ha kane ka jingrah lama ban pyni sha ka paidbah la don ryngkat naduh u Tengku M. Marak, uba dei u Meghalaya State President ka ABVP, u Bah Paralat Toor, ka Kong Marian Maring, ka Kong Nibiang Sumer ka State Secretary ka ABVP kynthup kiwei kiwei ki nongkyrshan ka party BJP.
Baroh ki nongshim bynta ki ia rah ia ka lama lai rong ka ri India ban pynpaw ia ka jingsgewsarong halor ka jingkynjoh ka ri India ban rakhe ia ka 78 snem ka jinglaitluid ka ri India.
Kumba la pynpaw ruh da u Myntri rangbah ka ri, u Narendra Modi halor ka ‘Har Ghar Tiranga’ na ka liang ka BJP Ri Bhoi rygnkat k a ABVP ki la shim ia ka sienjam ban pynurlong ia ka jingangnud u Narendra Modi bad kane ka jingrah lama ka ri India ka long ruh kum ka thong ban pynpaw sha ka pyrthei halor ka jingsarong ia kata ka sngi kyrpang ba ka ri India ka la ioh ia ka jinglaitluid la 78 snem ka jingiaid lynti.
