U Myntri rangbah ka ri India, u Narendra Modi, haba ai jingkren mynta ka sngi ha ka jingrakhe ia ka sngi laitluid ba 78 snem ka ri India ha Red Fort, Delhi, u la pynpaw paidbah ba ka sorkar India ka don iata kata ka thong ne ka jingiohi jngai ban tei na ka bynta ka lawei ka ri India.
La sakhi ruh ba da ki phew hajar ki paidbah ki la tuid sha Red Fort ban sakhi ia kane ka jingrakhe sngi laitluid ka ri India bad u Narendra Modi u la shim ka bynta kaba kongsan tam ban rakhe ia kane ka sngi Laitluid ka ri.
Haba ai jingkren ha kane ka sngi, u Narendra Modi kum u Myntri rangbah ka ri, u la kren halor shibun ki phang bad ki mat ba ka sorkar India ka buh tong ban kyntiew ia ka ri India ha baroh ki liang.
Kawei na ka thong, kaba u la pynpaw ba ka ri India ka don ia kata ka thong ban pynlong ia ka ri ha kata ka kyrdan ba kan paw shakhmat ha ki kam nongialam ha ka pyrthei hi baroh kawei.
Kiwei kiwei ki mat ki jura, kiba u la kren ban kyntiew ia ka ri India ki kynthup ban kyntiew ia ka hok longbriew man briew, ban kyntiew ia ka jingnang jingstad ba ka ri India ka dei ban long kawei kaba hakhmat eh, ban kyntiew shuh shuh ia ki jingdon ki Karkhana, ban iakhun pyrshah na ka jingkylla ka mariang, ban pynlong ia ka ri India ka ri kaba khuid ba suba, ban kyntiew ia ka koit ka khiah bad kiwei kiwei de, kiba u la buh thong ban kyntiew ruh ia ka ioh ka kot jong ka ri India.
Kawei na ka lad ka lynti na ka bynta ki khun samla ka ri, u Narendra Modi u la pynpaw ruh ba ka sorkar ka dong ia kata ka jingangnud haduh 1 lak ngut ki samla ban wan rah ne don bynta ha ka kam sain hima sima bad ka thong ka long ban pynsngewthuh ia ki samla ba kim dei ban don kano kano ka jingiapher jaid bynriew ne ka jingiasngewpher jaid bad kum ki samla ki dei ban don ka bynta kaba khaw eh ban saindur ia ka ri India lyngba ka jingdon jongki ha ki kam sain hima sima.
