Ka Hill State People’s Democratic Party (HSPDP) ha ka sngi Balang ka la buh biang ka jingkyrpad ia ka sorkar Meghalaya Democratic Alliance (MDA) na ka bynta ban shim khia biang ha ki kam ia pynbeit pud bad ka Assam kaba dei ha ka wat kaba ar, na ka bynta ki jaka ba dang ia kajia pud ha ki 6 tylli ki jaka ba ym pat lah ban ia pynbeit haduh kine ki sngi hadpeng ka jylla Meghalaya bad ka jylla Assam.
Ha ka shithi ba la phah sha u Chief Minister ka jylla Meghalaya u Conrad K. Sangma bad kumjuh ruh ha ka jingiakynduh ia u myntri rangbah ka jylla, u President ka HSPDP u Bah K.P Pangniang u laong, “Ka party HSPDP ka pynpaw ia ka jingai khublei kaba kyrpang ia ka rai ba rangbah a sorkar MDA ha kaba ha ka jingialam u Conrad K. Sangma kum u myntri rangbah la lah ban ia pynbeit ia ki 6 tylli ki jaka ba don ia ka jingiakajia pud ha u snem 2922 bad kaba donkam mynta ka long ban ia pynbeit noh ha ka wat kaba ar, kata sa ia ki 6 tylli ki jaka ba dang ia kajia pud ba la donkam ban bteng noh ia ka kam ban ia pynbeit noh kham kloi”.
U la pynpaw ruh wat la katta, ka HSPDP ka kyrpad ia ka sorkar MDA ban bteng biang ka jingiapynbeit pud ha ka wat kaba ar, kaba dang sahteng haduh kine ki sngi bad ka sorkar Assam. Ka party HSPDP kan jin da la sngewnguh ia ka ka sorkar MDA lada ka la shim khia ia kine ki kam sahteng kiba ia dei bad ki kam pynbeit pud hapdeng ka jylla Meghalaya bad ka jylla Assam.
Kumba u la pynpaw ruh sha ki lad pathai khubor, u Bah K.P Pangniang u lang ba u myntri rangbah ka jylla u Conrad K. Sangma u la kular ia ka party ba shen ka sorkar kan sa shim khia biang bad ka jylla Assam na ka bynta ban bteng biang ia ki kam ia pynbeit pud ha ka wat kaba ar, kata sa 6 tylli ki jaka ba ia kajia pud kaba ym pat lah ban ia pynbeit hapdeng ka sorkar Meghalaya bad ka sorkar Assam. U bah Pangniang u la iathuh ruh ba u myntri rangbah ka jylla u la kular ruh ban ia kynduh noh ia u myntri rangbah ka jylla Assam shuwa ban don ka dorbar synrai hapoh ka ing thaw ain ka sorkar jylla, u la bynrap.
