Ka Indian Medical Association (IMA) kala pynbna ïaka jingïakhih ba 24 kynta ha kaba ki Doctor kin weng ka jingai jingshari naduh ka 6 baje mynstep jong ka 17 tarik (Sngi Saitjaiñ) kum ka jing pyrshah halor ka jingshah leh beijot bad shah pyniap jong kawei ka doctor ha RG Kar Medical College and Hospital.
Ki doktor jong ka ri India, ki la khot ia ka jingkhang khyrdep ia ki jingshakri jong ki jaka sumar ha baroh kawei ka ri, katba ka jingbitar jong ki paidbah halor ka jingshah leh beijot bad pyniap jong ka doktor ba dang shah hikai ha ka nongbah Kolkata kaba don shaphang mihngi ha ka taiew ba la dep, ka nang kiew ha baroh ki bynta jong ka ri
Ka Indian Medical Association (IMA), kaba dei ka kynhun kaba heh tam jong ki nongsumar ha ka ri, ka la ong ba ïa kane ka jingkhang khyrdep kaba 24 kynta yn pyntreikam ha ka sngi Saitjaiñ, ka ban ktah ïa kiba bun ki tnad hospital, ha kaba ki OPD kin khang, lait noh tang ki jingshakri kiba donkam kyrkieh (emergency services).
Kane ka jingkhang khyrdep ka long hadien ba da ki hajar ngut ki paidbah ki la mih sha surok ha ki katto katne ki nongbah ban pynpaw ia ka jingbitar halor ka jingshah lehbeijot bad shah pyniap dusmon jong ka doktor ba dang shah hikai, ha kaba la lap ia ka met iap jong ka ha ka 9 tarik u Nailar ha RG Kar Hospital.
