Da ka jingsngewkhia kaba jur bad kum ka jingpynrem halor ka jingjia shah pyniap kaba shyrkhei jong kawei ka doctor ha ka jylla Kolkatta na ka liang ki nongtrei ka Meghalaya Medical Services Association (MMSA) ki la rai ban ai jingkyrshan kaba pura ia ka jingiakhih bad ka jingdawa jong ka Kynhun All India Federation of Government Doctor’s Association (AIFGDA), ha kaba ki dkhot ka MMSA ki la pynlong da ka jingdeng ia ki badges iong lane ka Black Badge Day ha 16 tarik Nailar.
Ha kane ka sngi, ki dkhot ka MMSA ki la pynlong ia ka jingdeng ia ki badges iong kum ka jingpynrem kaba jur halor ka jingshah pyniap kawei ka doctor ha ka jylla Kolkatta ia kaba la kynnoh ruh ba kane ka doctor ka la shah leh beijjot hashwa ba kan shah pyniap kane ka jingjia ka la jia ha ka RG Kar Medical College Hospital ha ka 9 tarik u Nailar.
Lah ban kdew, ba da ki hajar ngut ki nongtrei ka tnat ka Koit ka Khiah ki la mih madan ban pynlong ia ki jingiakhih bapher bapher da kaba khang ne strike ia ki jaka sumar hapoh ka ri India da ka jingdawa ban pynioh ia ka jingbishar kaba hok halor katei ka jingjia kaba sngewsih kthang kaba la jia pyrshah ia kawei ka doctor kaba la shah leh beijot bad shah pyniap ha Kolkata.
Ha Meghalaya nalor ka MMSA, ki bor pyniaid ka Bethany Outreach Hospital ki la rai ban snohkti lang ha kane ka jingiakhih da kaba yn khang ia ka OPD ha ka 17 tarik u Nailar.
